2024 2023 2022 Flere år...
17-12-2013
Ilaqutariinnermut Peqqissutsimullu Ataatsimiititaliaq ulluni 10.-13. december 2013 Københavnimi ilisimasassarsiorluni angalanera iluatsilluarpoq
Ilaqutariinnermut Peqqissutsimullu Ataatsimiititaliami ilaasortanit arfineq marluk Københavnimi ulluni 10.-13. december 2013 pissanganartumik isumassarsiorfiusumillu ilisimasassarsiorlutik angalapput.
Ulloq 10. december 2013 tassaavoq ataatsimiititaliap Købejnhavnip kommuniani tikeraarnerani ullunit marlunnit ulloq siulleq, Københavnimi ilaqutariinnermut meerartalinnut siunnersuisarfiup pulaarneqarneratigut ulloq aallarnerneqarluni, tamatumani ulluunerani paaqqinniffinni atuarfinnilu meeqqat inuusuttullu sanngiitsut mianernartullu tapersersorneqarnissaat siunertaralugu kommunit nassaarniarnermik siusissukkullu iliuuseqartarnermik suliaat pillugit ataatsimiititaliaq ilisimatinneqarluni.
Inuusuttunut ulloq unnuarlu paaqqinniffinni matoqqasuni ilaannakortumillu matoqqasuni pissaanermik atuisarneq pillugu maleruaqqusat ualikkut aallunneqarput ataatsimiititaliarlu ilaatigut ulloq unnuarlu paaqqinniffimmi matoqqasumi, Sønderbro, takornariartinneqarpoq aammalu ulloq unnuarluni nakkutigineqarluni paaqqinnittarfiit pissaanermik atuinermik suliaqarneranni, tassunga ilanngullugu pissaanermik atuinissamik pitsaaliuinermi immikkut ilisarnaatit akimmiffiillu pilluigt saqqummiussamik pissarsillutik.
Pingasunngorneq ulloq 11. december Københavnip Rådhusiani isumaginninnermut borgmesterimik Mikkel Warmingimik ataatsimeeqateqarnermik aallarnerneqarpoq, tamatuma kingorna inuusuttunut immikkut siunnerfeqarluni kommunip hashimik atornerluinermut pitsaaliuinera kiisalu hashimik imigassamillu atornerluinermut katsorsartinnissamik neqerooruteqartarnera pillugit ataatsimiititaliaq saqqummiussivigineqarpoq.
Ualikkut kommunip angerlarsimaffeqanngitsunut neqeroorutai suliniutaalu pillugit paasisaqarnissaq siunertaralugu ataatsimiititaliap Sundholm pulaarpaa. Angerlarsimaffeqanngitsunik ajornartorsiut nunatsinni ajoraluartumik annertuumik aamma ajornartorsiutaavoq aammalu angerlarsimaffeerunneq akiorniarlugu pitsaaliuineq kiisalu Sundholmimi angerlarsimaffeqanngitsut unnuisarfiannik atuisunut, taakkunanit amerlasuut kalaaliullutik, kommunip neqeroorutai pillugit paasissutissanik attuumassuteqartunik ataatsimiititaliaq annertuumik pissarsivoq.
Sisamanngornermi ulloq 12. december ataatsimiititaliap ataatsimeeqatigai atugarissaarnermik nuna tamakkerlugu ilisimatusarfik (Det nationale Forskningscenter for Velfærd (SFI)) aammalu isumaginninnikkut ineriartortitsivik (Det Sociale Udviklingscenter (SUS)), tamatumani Danmarkimi kalaallit inooqataanikkut ajornartorsiutillit pillugit suliat sluiniutillu immikkut sammineqarlutik.
Tallimanngorneq ulloq 13. december 2013 løvstrædimi kalaallit illuanni paasisassarsiorluni takuniaanermik aallarnerneqarpoq, tamatumani illut nalinginnaasumik atuuffia pillugu ilisimatinneqarnerup saniatigut illumi isumaginninnikkut suliat nakkutiginninnermilu periuseq pillugit ilisimatitsisoqarpoq.
Pisut naggaserneqarput Kalaallit Katsorsartittut Akunnittarfiannut pulaarnermik, tamatumani katsorsartittut akunnittarfiannik atuisut nuannersumik persuarsiunngitsumillu kaffisoqatigineqarlutillu oqaloqatigineqarlutik.
Suliassaqarfinni taagorneqartuni amerlasuuni uagut nammineq suliniutitta neqeroorutittalu pitsanngorsarneqarnissaat anguniarlugu ataatsimiititaliaq paasisassarsiorluni angalanermini paasissutissanik ilisimasanillu attuumassuteqarluinnartunik atorneqarsinnaalluartunillu pissarsivoq.
Paasisassarsiorluni angalanermi ilaasortat peqataasut tassaapput - Lars P. Mathæussen, Karl-Kristian Kruse, Anders Olsen, Anda Uldum aammalu Juliane Henningsen kiisalu ataatsimiititaliami sinniisut Ane Hansen aamma Saxtorph Didriksen.
Annertunerusumik paasisaqarusukkaanni itisiliisitserusukkaannilu saaffigineqarsinnaavoq Ilaqutariinnermut Peqqissutsimullu Ataatsimiititaliap siulittaasua Lars P. Mathæussen, mobil 24 17 88.