2024 2023 2022 Flere år...
26-06-2013
Inuussutissarsiutinik ingerlatsiinnarsinnaanermut akuersissut
Qinigaanerup Misilinneqarnissaanut Ataatsimiititaliap ulloq 24. juni ataatsimiinnermini aalajangerpaa Ineqarnermut, Pinngortitamut Avatangiisinillu Naalakkersuisup Miiti Lyngep Anori Art Apsimi kiisalu Ejendomsselskabet Miiti Apsimi inuussutissarsiornikkut soqutigisaminik ingerlatsiinnarsinnaanissaa akueriniarlugu.
Ataatsimiititaliap taamatut aalajangernermigut ilaatigut pingaartippaa Miiti Lyngep ilisimatitsissutigisimammagu ingerlatseqatigiiffiit pineqartut marluk ulluinnarni ingerlanneqarnerat Miiti Lyngep aappaanit sulisuinillu ingerlanneqassasoq, taamaattumillu aamma ingerlatseqatigiiffiit ulluinnarni ingerlanneqarnerat Naalakkersuisutut atuuffianit piffissamik tigusaqartussaassanani, kiisalu inuussutissarsiornikkut soqutigisai imatut pissuseqaratillu annertutiginatik naalakkersuisuni sulinerani soqutigisatigut aporaattoqalersinnaallunilu peqataasinnaaneraluunniit sanngiillisinneqarani. Ataatsimiititaliap taamatuttaaq malittarisassat atuuttut taamatut isikkoqalermatali suleriaaseq ineriartorsimasoq pingaartissimavaa.
Ineqarnermut, Pinngortitamut Avatangiisinullu Naalakkersuisumut pinnersaasiassanik piiaa-sinnaanermut akuersissut eqqarsaatigalugu taassuminnga ingerlatsiinnarsinnaanera ataat-simiititaliap itigartippaa. Tamatuma malitsigisaanik Miiti Lyngep ataatsimiititaliamut ilisimatitsissutigaa tamanna tunngavigalugu akuersissut ingerlaannaq utertinniarlugu.
Ineqarnermut, Pinngortitamut Avatangiisinullu Naalakkersuisup inuussutissarsiumminik ingerlatsiinnarsinnaanermik akuerineqaqqulluni qinnuteqaataa ulloq 13. juni aatsaat ataat-simiititaliamit tiguneqarpoq. Ataatsimiititaliap Miiti Lyngemut tamanna tunngavigalugu erseqqissarpaa ataatsimiititaliaq isumaqarmat taama kingusitsigisukkut qinnuteqaammik nassiussineq assut naammaginartinnagu. Miiti Lyngep tamanna tusaatissatut tiguaa pisullu ingerlasimanera ajuusaarutigalugu.
Tamatumunnga atatillugu ataatsimiititaliap pissusissamisoorsoraa erseqqissassallugu Naa-lakkersuisut atuuffimminnik inuussutissarsiumminnilluunniit ingerlatsiinnarniartut Naalakker-suisutut atuutilernerminni ingerlaannaq tamatuminnga Qinigaanerup Misilinneqarnissaanut Ataatsimiititaliamut akuerineqaqqaarnissaminnik qinnuteqaqqaartarnissaannik inatsisitigut piumasaqaatip eqquutsinneqartarnissaa innuttaasut Naalakkersuisunik tatiginninnerannut pingaarutilerujussuummat. Taamaattumik ataatsimiititaliap siumut isigisumik neriuutigaa Inatsisartut sulinerannik malittarisassanillu atuuttunik ataqqinninneq pitsaanerulerumaartoq.
Atuuffinnik inuussutissarsiutinilluunniit ingerlatsiinnarniarluni qinnuteqaatinik allanik ataatsi-miititaliap suliarinninnera pillugu ilisimatitsissutigineqarsinnaavoq Peqqissutsimut Attaveqar-nermullu Naalakkersuisoq Steen Lynge ulloq 1. maj ataatsimiititaliamut qinnuteqarmat, ki-ngusinnerusukkulli utertiinnakkaminik.
Inatsisartut Siulittaasuat Lars-Emil Johansen taamatuttaaq ulloq 1. maj ataatsimiititaliamut qinnuteqarpoq, ataatsimiititaliamillu akuerineqarluni Timersoqatigiit Kattuffiannut illersuisutut aamma Danmarkip-Kalaallit Nunaata kulturimut aningaasaateqarfiata siulersuisuinut ilaasortatut atuuffimmi ingerlatiinnarsinnaanissaannut.
Ataatsimiititaliaq qinnuteqaatinik allanik tigusaqanngilaq. Taamaattorli § 37 naapertorlugu apeqqummut akissumminni Naalakkersuisut ilisimatitsissutigaat Naalakkersuisoq Martha Lund Olsen siunnersuisarfimmik suliaqanngitsumik piginnittuusimammat. Suliffeqarfik 6. maj 2013-imiilli taamaatinneqarsimavoq.
Taamaalilluni Miiti Lyngep qinnuteqaataata aalajangiivigineqarneratigut ulloq 5. april Inatsisartut inissititereernerisa Naalakkersuisunillu qinersisoqareernerata kingorna atuuffinnik inuussutissarsiutinillu ingerlatsiinnarnissamik qinnuteqaatinik suliarinninnini naammassivaa.
Ataatsimiititaliap neriuutigaa siunissami inissititerfiusumik ataatsimiinnerup kinguninngua massakkornillu siusinnerungaartumik taamatut qinnuteqaatit suliarineqartarnerat naammas-sineqartarumaartoq.
Evelyn Frederiksen
Qinigaanerup Misilinneqarnissaanut Ataatsimiititaliap siulittaasua