Nutaarsiassat


2021 2020 2019 Flere år...

04-02-2014

Inatsisartut Aatsitassanut Ataatsimiititaliaat paasisassarsiorluni Australiami angalavoq

Inatsisartut 2013-imi ukiakkut ataatsimiinneranni atortussiassanik aatsitassanit pisunit piaanermut atatillugu atortussiassanik uranimik akulinnik attueqqusinngilluinnarnerup atorunnaarsinneqarnissaa Inatsisartuni amerlanerussuteqartut akueraat. Australia naalagaaffiuvoq ukiorpassuarni aatsitassanik radioaktiviusunik piaaviullunilu suliarinninnermik ingerlatsiviusimasoq, peqatigitillugulu aatsitassat tamakku suliarineqartarnerat eqqarsaatigalugu inatsisiliornernik malittarisassiornernillu annertuunik ineriartortitsiviusimasoq.

 

Ukiuni aggersuni nunatsinni atortussiassanik uranitalinnik piaasinnaanermut suliarinnissinnaanermullu inatsisit malittarisassallu nutaat atuutilersinneqartartussaapput, tamannalu tunngavigalugu Inatsisartut Aatsitassanut Ataatsimiititaliaat aalajangersimavoq suliassaqarfimmi ukiorpassuanngortuni Australiap misilittagarilersimasai ilinniarfiginiarlugit Australiamut paasisassarsiorluni angalaniarluni.

 

Paasisassarsiorluni angalanermi ullormi siullermi ataatsimiititaliap nunarsuatsinni uranimik qalluiviit annersaat pulaarpaa, tassanilu ilaatigut tusarlugu urani qanoq piiarneqarlunilu suliareqqinneqartarnersoq, peqatigitillugu aamma aatsitassanik qalluivik eqqarsaatigalugu avatangiisit isumannaallisaanerlu eqqarsaatigalugit pissutsit ajornartorsiutaasinnaasullu pillugit ilisimatinneqarluni. Ataatsimiititaliaq ulluni aggersuni ilaatigut Australiami Niuernermut Nukissiuuteqarnermullu Naalakkersuisoqarfiup, Suliffissuaqarnermut Naalakkersuisoqarfiup Avatangiinullu Naalakkersuisoqarfiup sinniisaanik ataatsimeeqateqartassaaq, taamatullu aamma suliniaqatigiiffinnik aqutsisoqarfinnillu aatsitassat radioaktiviusut siunertanut pitsaasunut atorneqarnissaannik ineriartortitsinernik, taamatullu aamma aatsitassanik igitassanillu radioaktiviusunik suliarinittarneq eqqarsaatigalugu immikkut ilisimasalinnik naapeqateqartassalluni. Ataatsimiititaliaq taamatuttaaq suliniaqatigiiffinnik naalakkersuisutiguunngitsunik naapeqateqassaaq.

 

Paasisassarsiorluni angalaneq Naalakkersuisut suleqatigalugit pivoq, Naalakkersuisunit Aatsitassanut Inuussutissarsiornermullu Naalakkersuisoq aamma Avangiisinut Pinngortitamullu Naalakkersuisoq peqataallutik.