Nutaarsiassat


2021 2020 2019 Flere år...

10-02-2014

Naqqiut Sermitsiamut nr. 6

Inatsisartunut ilaasortap Jens B. Frederiksenip tunuarnerani "illersuisutut allakkatut" ilusilittut paasineqarsinnaalluni "tusagassiortumit misissuisumit" allanneqartoq atuagassiaq takisooq Sermitsiap ulloq 7. februar 2014-imi saqqummiuppaa. Tassunga atatillugu ataani atsiortoq pillugu paasissutissanik eqqunngitsunik Sermitsiaq saqqummiussimmat naqqiuteqartoqarnissaa matumuuna qinnutigissavara.

 

Uanga pillunga paasissutissat eqqortut makku nalunaarutigineqassapput:

a) Ataani atsiortup holdingselskabimut Greenland Ressources A/S-imut attaveqarnera pillugu paasissutissat sutigut tamatigut kukkusuupput.
b) Ataani atsiortoq Greenland Ressourcesip siulersuisuinit ulloq 27. april 2011-mi tunuarpoq, tamatumalu kingorna ingerlatseqatigiiffiup siulersuisui aaqqissuuteqqinneqarlutik
c) Ataani atsiortoq ingerlatseqatigiiffimmi soqutiginnittutut piginnittuujunnaarnikuuvoq aammalu Inatsisartunut qinigassanngortikkama aamma taamaattoqarnani
d) Ataani atsiortup inussutissarsiornikkut soqutigisai tamarmik qinigaanerup misilinneqarnissaanut ataatsimiititaliamut 2013-imi upernaakkut piffissami Inatsisartunut qinigaaninni tamakkiisumik nassuiaatigineqarput

 

Siuliani taaneqartut tunngavigalugit atuagassiap sinnerata imai qanoq annertutigimik ilumoortuunersut apeqqusersinnaavara.

 

Naggasiullugulu ilisimaneqareersoq tamanillu nalinginnaasumik ilisimaneqartoq Sermitsiamut aviisillu "tusagassiortuanut misissuisumut" nassuiaatigissavara. Akuersissutinik tunniussinissaq pillugu aalajangigassat Inatsisartunit aalajangerneqarnatik Naalakkersuisunit aalajangerneqartarput

 


 Lars-Emil Johansen
Inatsisartut Siulittaasuat


  
Paasissutissat sukumiinerusut Inatsisartut Siulittaasuat Lars-Emil Johansen, angallattagaq 55 19 15, attaveqarfigalugu pissarsiarineqarsinnaapput.