2024 2023 2022 Flere år...
19-02-2014
2014-imi Inatsisartut Upernaakkut Ataatsimiinnissamut oqaluuserisassat piareerput
Inatsisartut Siulittaasoqarfiata 2014-imi inatsisartut upernaakkut ataatsimiinnissaannut (UPA14) oqaluuserisassat ullumi nalunaarutigaat, marlunngornermi ulloq 11. februar 2014 siunnersuutinik tunniussinissamut killissarititaasumit ullut arfineq-pingasut qaangiutiinnartut.
Inatsisartut upernaakkut ataatsimiinnerat marlunngornermi ulloq 18. marts aallartissaaq, ulloq 5. juni naammassineqarnissaa pilersaarutaalluni.
Ullut ataatsimiiffiusussatut pilersaarutigineqartut katillugit 30-iupput. Ullut ataatsimiiffiusussat ingerlaavartussaapput, taamaalillunilu immikkoortut ulluni oqaluuserineqarfissaminni angumerineqanngitsoortut ullormi ataatsimiiffiusussami tullermi oqaluuserineqartassallutik.
Oqaluuserisassanut ilaasortat siunnersuutaat 56-it Nunallu Avannarliit Killiit Siunnersuisoqatigiiffiannut aallartitanit kaammattuutitut aalajangersakkat sisamat ilanngunneqarput. Naalakkersuisut immikkoortunik 27-inik oqaluuserisassaateqarput, aningaasaqarniarnikkut ingerlatsineq pillugu nassuiaatip saniatigut. Immikkoortut 16-it UKA13-imit kinguartinneqartut aamma UPA14-imi siullermeerneqarlutilluunniit aappassaaneerneqassapput.
Ullut ataatsimiiffiusussat sapaatit akunnerini ima agguataarneqarsimapput:
Sapaatip akunneranut ullut pingasut (marlunngornerit, pingasunngornerit sisamanngornerillu) nal. 13.00-imiit 18.00-imut ataatsimiiffiusussapput.
Piffissami apriilip ulluisa aqqaneq-aappaanniit 22-iat ilanngullugu poorski pissutigalugu Inatsisartuni ataatsimiittoqassanngilaq, soorlu aamma UPA14-ip ingerlanerani ullut sulin-ngiffiit nalliuttullu pingasuusut, tassa maajip ulluisa aallaqqaataat, Tussiarfissuaq (16. maj) Qilaliarfillu (29. maj).
Siulittaasoqarfiup tamatuma saniatigut ullormi ataatsimiiffiusussami siullermi inassutiginiarpaa UKA14 ulloq 30. september aallartissasoq, UPA14-ip kingusissukkut naammassinissaata naatsorsuutigineqarnera UKA14-illu sulinngiffeqarnerup kinguninnguata pilersaarusiorneqarnissaa tamatumunnga pissutaapput.
Qulaani taaneqartut saniatigut pisarnertut pingasunngornerit tamaasa piffissami nal. 11-miit 12.00-imut naalakkersuisunut apeqquteqartoqartarsinnaassaaq.
UPA14-imut atatillugu atortussat tamarmik inatsisartut.gl-imi takuneqarsinnaapput. Ataatsimiinnermut atortussat tamarmik ingerlaavartumik qarasaasiakkut tigusarnissaannut periarfissaqarpoq. Tamanna pillugu Laila Kristiansen lkri@inatsisartut.gl saaffigineqarsinnaavoq.
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat Lars-Emil Johansenangallattagaq +299 55 19 15 attaveqarfigalugu pissarsiarineqarsinnaapput.