2024 2023 2022 Flere år...
30-05-2014
Kalaallit Nunaata uuliasiornermut aatsitassarsiornermullu 2014-2018-imut periusissaa pillugu ataasinngornermi Katuami tamanut tusarniaanermut ornigugit peqataallutillu
Ataasinngorpat ulloq 2. juni kikkut tamarmik soqutiginnittut Kalaallit Nunaata uuliasiornermut aatsitassarsiornermullu periusissaa pillugu tamanut tusarniaanermut peqataanissaminnut periarfissaqarput. Tusarniaaneq pissaaq Katuami nal. 11.30-mit nal. 18-ip tungaanut aammalu Aatsitassanut Ataatsimiititaliamit ingerlanneqassalluni.
Periusissap imarisaa siunertaalu pillugit siammasinnerusumik oqallinnissaq ilisimasaqalernissarlu siunertaralugit uuliasiornermut aatsitassarsiornermullu 2014-2018-imut periusissaq tusarniaanermi qitiutillugu anguniarneqarpoq. Ilimagisat inerniliinerillu suut periusissami tunngavigineqarpat - aammalu aqqutip tamatuma ingerlaviginissaa inuiaqatigiittut uagut kissaatigaarput?
Uuliasiornermik aatsitassarsiornermillu suliffissuaqarnerup ineriartortinneqarnera periarfissanik aammali unammilligassanik - Kalaallit Nunaannut tamarmut kinguneqartussanik - nassataqassaaq. Taamaattumik siunissami inuiaqatigiit qanoq isikkoqarnissaat pillugu ataatsimoorluta isummernissarput pingaaruteqarpoq: Aatsitassarsiornermik ingerlatsineq- aningaasaqarnitta, kulturitta avatangiisittalu attassinnaasaat qanoq pilersissavarput?
Immikkut ilisimasallit nuimasut arlallit peqataasussatut aggersarneqarput. Minik Rosing, nalunaarusiamik "Kalaallit Nunaannut iluaqutaasussatut"-mik saqqummiusseqqammersoq aammalu Aqqaluk Lynge ICC-meersoq saqqummiussaqassapput. Uuliasiornermik aatsitassarsiornermillu ingerlataqartunit peqataassapput Nunaoil, Nunaminerals aamma London Mining. Aammattaaq Transparency Greenland, Kalaallit Nunaanni Sulisitsisut Peqatigiiffiat, SIK, KPMG, Pinngortitaleriffik aamma KNAPK, Kalaallit Nunaanni uuliasiornermut aatsitassarsiornermullu periusissaq pillugu saqqummiussisussatut aggersarneqarput.
Paasisimasallit sassartitat oqallinnerisa nalaani kikkulluunniit apeqquteqarnissaminnut periarfissaqarput. Peqataajartorit aammalu nunatta iluaniittut nalillit inuiaqatigiittut qanoq iluaqutiginiarsinnaanerannik - aammalu aatsitassarsiornermik ingerlatsinerup ukiuni aggersuni qanoq ineriartortinneqarsinnaaneranut tunngavissat oqallisigineqarneranni tusarnaariartorlutit. Aatsitassanut Ataatsimiititaliaq sinnerlugu amerlasuut peqataanissaat neriuutigaara.
Gerhardt Petersen
Aatsitassanut Ataatsimiititaliap siulittaasua
Annertunerusumik paasisaqarusukkaanni saaffigineqarsinnaavoq Aatsitassanut Ataatsimiititaliap siulittaasua Gerhardt Petersen, mobil 52 62 55.