Nutaarsiassat


2021 2020 2019 Flere år...

04-06-2014

Kalaallit Nunaata Uuliasiornermut Aatsitassarsiornermullu 2014-2018-imut Periusissaata Katuami tamanut tusarniutigineqarnera iluatsilluarpoq

Kalaallit Nunaata uuliasiornermut aatsitassarsiornermullu 2014-2018-imut periusissaatut Naalakkersuisut saqqummiussaat Inatsisartut Aatsitassanut Ataatsimiititaliaannit aaqqissuunneqartumik Katuami ataasinngornermi ull. 2. juni tamanut tusarniutigineqarpoq. Inatsisartut aatsaavissuaq tamanut tusarniaanermik ingerlatsipput.

 

Tusarniaaneq, KNR-ikkut aamma aallakaatinneqartoq, assut iluatsilluarpoq, tamatumani amerlasuut oqallinnermut peqataajartorlutik apeqquteqariartorlutillu najuullutik. Aatsitassarsiornermi suliniutissanut atatillugu sinaakkutissatut piumasaqaatinik aalajangersaallutik Aatsitassanut Ataatsimiititaliap Inatsisartullu suliaqarnerannut atasumik tusarniaaneq pivoq.

 

Taamaalilluni aatsitassarsiorneq pillugu oqallinnermi illuatungeriit peqataasut ataasinngornerup ualia tamaat arlalissuarnik pissanganartunik saqqummiussipput, taamaaliornikkullu isummersuutit assigiinngitsut sammisamullu attuumassuteqartut amerlasuut paasinarsitinneqarput, tamatumalu kingorna apeqqarissaartoqarneratigut itisiliisoqaqqilluni.

 

Katuami Ikinngutigiit Inaat inissaarutingajallugu inoqarpoq, najuuttullu apeqqutissaqarluarlutik. Saqqummiunneqartut apeqquterpassuillu aqqutigalugit aatsitassanut tunngasumik suliat ingerlateqqinneqarnissaannut ataatsimiititaliaq pissarsilluarpoq.

 

Aatsitsassarsiornermut tunngasumik apeqqutit pillugit nunatsinni inuiaqatigiit siammasissumik uummaarissumillu oqallinnerisa ingerlateqqinneqarnissaanut tusarniaaneq aamma peqataaqataajumaartoq ataatsimiititaliamit neriuutigineqarpoq.

 

Katuami saqqummiussisut aammalu KNR aaqqissuussamik tamarmiusumik TV-kkut toqqaannartumik aallakaatitsisoq qujaffigerusuppagut.

 

Aaqqissuussaq pillugu paasissutissat annertunerusut uani pissarsiarineqarsinnaapput:

ina.gl/tusarniaaneq

 

 

Gerhardt Petersen

Aatsitassanut Ataatsimiititaliami siulittaasoq

 

 

Annertunerusumik paasisaqarusukkaanni saaffigineqarsinnaavoq Aatsitassanut Ataatsimiititaliap siulittaasua Gerhardt Petersen, mobil 52 62 55.