2024 2023 2022 Flere år...
03-07-2014
Saarullinniarnermi allanngoriartorneq illuanut saatinneqarli
Sinerissap qanittuani saarullinniarnerup allanngoriartornera Aalisarnermut, Piniarnermut Nunalerinermullu ataatsimiititaliap ernumanartoqartippaa.
Tunisinermi akit appasinnerat killilimmillu tunitsivinnut periarfissaqarneq ataatsimut aalisarnermi aningaasarsiornermut pitsaanngitsumik kinguneqartitsipput, aalisartunullu ataasiakkaanut taakkulu ilaqutaannut atugassarititaasunik suli ajorsiartortitsillutik.
Siusinnerusukkut akinik minnerpaaffiliinissaq oqallisaasarnikuuvoq, tunisinermilu akigititaq sinerissap ilaani 3 kr.-it missaannaaniilernikuummat, Ataatsimiititaliaq isumaqarpoq siunnersuut qaqeqqinneqassasoq. Taamaalilluni inuussutissarsiummi akinik minnerpaaffiliinissamik Naalakkersuisut isumaliuteqarnertik saqqummiuteqqissagaat Ataatsimiititaliap Naalakkersuisunut kaammattuutigerusuppaa.
Peqatigitillugu Ataatsimiititaliaq Naalakkersuisunut kaammattuivoq, sinerissap qanittuani saarullinniarnermi aaqqissuussaanikkut ajornartorsiutit qanoq aaqqiivigineqarnissaannut Naalakkersuisunit misissuissasut. Ataatsimiititaliami ilaasortat akuttunngitsumik inunnit aalisalerusuttunit akuersissuteqarnissamulli itigartinneqarsimasunit saaffigineqartarput.
Taamatuttaaq sinerissap qanittuani saarullinniarnermut atatillugu nunatta kujataani aalisarnermi unittooqqanerup - ilaatigut tunitsivissaaleqinermik pissuteqartumik - piaartumik immikkut tigussaasumik iliuuseqarfigineqarnissaanik sulissuteqartoqarnissaa ataatsimiititaliap kaammattuutigaa.
Aalisarnermi pitsaasumik atugassaqartitsinissamut aamma aalisartut akinik naammaginartunik naammattumillu tunitsivinnut periarfissaqartinnissaannik isumannaarinissaq pingaaruteqarluinnartuuvoq, taamatummi atugassaqartitsinikkut aalisarnermi pitsaanngitsumik maanna allanngoriartorneq illuanut saatinneqarsinnaavoq.
Nikolaj Jeremiassen
Aalisarnermut, Piniarnermut Nunalerinermullu ataatsimiititaliami siulittaasoq
Pasisaqarnerorusunnermi Ataatsimiititaliap siulittaasua Nikolaj Jerimiassen oqarasuaammut uunga attavigineqarsinnaavoq: +299 53 32 63.