2024 2023 2022 Flere år...
11-08-2014
Kukkunersiuinermut Ataatsimiititaliap Savalimmiuniinnera
Kukkunersiuinermut Ataatsimiititaliap sapaatip akunnerani
qaangiuttumi´Savalimmiuni Lagtingip kukkunersiuisui aammalu
Savalimmiuni nunap
kukkunersiuisua naapeqatigai.
Ilaatigut neqerooruteqartarnermut internetikkut nittartagaq
pilersinneqaqqammersoq aammalu pisortani oqartussaasut aningaasat
aalajangersimasumik amerlassusillit sinnerlugit atorneqassatillugit
nioqqutissanik sullississutinillu neqerooruteqaqqusillutik
saqqummiussiffigissallugu pisussaaffigisaat pillugu
ataatsimiititaliaq ilisimatinneqarpoq. Internetikkut nittartagaq
sipaaruteqarnissaq pingaartumillu pisortat aningaasanik sulisunillu
atuineranni ammanerunissaq pillugit pilersinneqarpoq.
Savalimmiuni namminersornerullutik oqartussat
ingerlatseqatigiiffinnik aningaasaateqarfinnillu piginnittuuneranni
inissisimaneq pillugu nassuiaat; "Hjemmestyret som ejer"
(namminersornerullutik oqartussat piginnittutut);
naammassineqaqqammersoq pillugu Savalimmiuni nunap
kukkunersiuisua
ataatsimiititaliamut ilisimatitsissuteqarpoq. Maleruaqqusat il.il.
ingerlatseqatigiiffinnik ingerlatsinermut aammalu
namminersornerullutik oqartussat piginnittutut inissisimanerannut
pingaaruteqartut takussutissiornissaat nassuiaateqarnermi
anguniagaavoq. Nassuiaat kaammattuutinik arlalinnik, tassunga
ilanngullugu piginnittumut politikissamik pisortat
ingerlatseqatigiiffinnut atatillugu iliuuseqartarneranni
tunngaviusinnaasumik oqaasertalersuinermik inerneqarpoq.
Aammattaaq pisortat aningaasaqarnikkut periusiat ukiuni
arlalinni ingerlanneqarsimasoq aammalu assorsuaq
sunniuteqarluartutut paasineqartoq pillugu ataatsimiititaliaq
saqqummiussivigineqarpoq. "Naalakkersuisut aningaasarnikkut
periusissatut suliniutaat maanna ingerlanneqartoq assinganik
iluatsitsiffiulluarumaartoq uanga Kukkunersiuinermullu
Ataatsimiititaliamut ilaasortat sinnerisa neriuutigaarput.
Taamaattoqassappat Namminersorlutik
Oqartussani aningaasaqarnermut akisussaasut pisoqannginnerani
iliuuseqartarnissamut tassuunakkut periarfissinneqassapput", taama
oqaaseqarpoq ataatsimiititaliami siulittaasoq Kristian Jeremiassen.
Angalanermi ilaapputtaaqm Agathe Fontain aammalu Juliane
Henningsen.
Paasissutissat annertunerusut ataatsimiititaliap siulittaasuanut Kristian Jeremiassenimut mobil +299 54 06 94, saaffiginninnikkut pissarsiarineqarsinnaapput.