2024 2023 2022 Flere år...
27-08-2014
Johannes Kristensenip (Juaanseeraq) sølviusumik Nersornaaserneqarnera
Sapaatip akunnerani kingullermi marlunngornikkut Innaarsunni nalliuttorsiorpaluttumik katerisimaarnermi Inatsisartut siulittaasuata tulliata siullip Agathe Fontainip Johannes Kristensen sølviusumik Nersornaaserpaa.
Inatsisartut Siulittaasoqarfiata Johannes Kristensen sølviusumik Nersornaaserpaa ukiuni 14-ini kommunalbestyrelsimi nunaqarfinnilu aqutsisuni suleqataanikkut Innaarsuit ineriartornerannut annertuumik sunniuteqaqataasimanera pissutigalugu - nunaqarfiup innuttaasunut amerliartortunullu 160-it missaannut iluaqutaasumik nunaqarfiullu ullumikkut nunatsinni nunaqarfiit ingerlalluarnerpaanut ilaalersimaneranut tunngaviusumik.
Johannes Kristensenimut oqalugiarnermini Agathe Fontainip ilaatigut makku erseqqissaatigai:
"Innaarsuit tunngavilerneqarnerminnit ukioq manna ukiunik 100-liipput, illillu Juaansiaraq, taannaavutit Innaarsunnik tunngaviliisup Valdemar Kristensenip meeraasa maanna peqqissut angajullersaat, taamaalillutillu peqataasimallutit nunaqarfiup ullumikkumut tulluusimaarutigisatsinnik ingerlalluarluni ataavarsimaneranut ineriartorsimaneranullu.
(.)
Juaansiaraq, nalunngilarput angallarissuusutit ikiuukkumatuujullutillu. Tamanna takuarput timmisartuaraq nunaqarfiliartaat nakkarmat, pisinnaasatit naapertorlugit qimussimit annaatuusut ikiorakkit. Suliniuteqarnissamut taamatuttaaq tunuarsimaarsimanngilatit, namminersortumik tunitsiveqalermat aammalu nunaqqatitit peqatigalugit elværkeqarneq aallartisaaqataaffigigakku."
Agathe Fontain
Inatsisartut siulittaasuata tullia siulleq
Annertunerusumik paasisaqarusukkaanni saaffigineqarsinnaavoq Inatsisartut siulittaasuata tullia siulleq Agathe Fontain, mobil +299 34 62 66.
