2024 2023 2022 Flere år...
27-08-2014
Ilaqutariinnermut Peqqissutsimullu Ataatsimiititaliap Upernavimmut nunaqarfiinullu pissarsiviulluartumik paasisassarsiorluni angalanera
Ilaqutariinnermut Peqqissutsimullu Ataatsimiititaliaq ulluni 15. - 20. august 2014-imi Upernavimmi eqqaanilu inuuniarnikkut pissutsit erseqqinnerusumik paasisaqarfiginiarlugit pissarsiviulluartumik paasisassarsiorluni angalaqqammerpoq.
Upernaviup eqqaatalu ilisarnaatigaa innuttaasut amerlanatik isorartoorujussuarmi pinngortitamilu pisuussutinik uumassusilinnik peqarluartumi siammartersimanerat. Sumiiffimmi pinngortitami pisuussutinik uumassusilinnik peqarluaraluartoq inuiaqatigiit amerlanerpaartaat assigalugit atugarissaarnermik attassiniarneq ineriartortitsinerlu arlalitsigut unammilligassaqarfiupput.
Innuttaasut siammasissumik najugaqarnerat inuiaqatigiit atugarissaarnerannit, pingaartumik isumaginninnerup peqqissutsillu iluini sullississutit ilaannik pissarsinissaq siunertaralugu nunap immikkoortuani innutaasut arlallit ulluinnarni unammilligassaqarput.
Nunaqarfinni isorliunerusunilu atugarissaarneq ineriartornerlu politikikkut qanoq pitsaanerpaamik qulakkeerneqarsinnaanersut pillugu apeqqut ataatsimiititaliap tikeraarnermini immikkut eqqumaffiginiarpaa. Ataatsimiititaliap qitiusumik suliassaqarfiata, tassalu isumaginninnermut peqqissutsimullu tunngasut iluini politikikkut pitsanngorsaanissaq siunertaralugu ataatsimiititaliap tikeraarnermi kingorna Naalakkersuisunut ilaasortat susassaqartut politikikkut oqaloqatigalugit aallartissavai.
Politikikkut akisussaaffik kommunimiinnersoq imaluunniit Naminersorlutik Oqartussaniinnersoq apeqqutaatinnagu pissutsit arlaqarput ataatsimut piumassuseqarnikkut, aallussinikkut pingaarnersiuinikkullu pitsanngorsarneqarsinnaasut. Sumiiffinni illuutit meeqqanit, inuusuttunit innuttaasunillu suliniuteqartunit atorluarneqarnerunissaannut periarfissaqarpoq. Pitsaaliuinermi suliniutit, peqqissuseq isumaginninnikkullu pissutsit nukittorsarneqarnissaat annertusarneqarnissaallu siunertaralugu illoqarfiit nunaqarfiillu ilaasa immikkut aallunneqarnissaannu periarfissaqarpoq. Utoqqarnik isumassuinerup pisariaqartinneqartumik qaffassarneqarnissaanut periarfissaqarpoq. Nunap immikkoortuani ataatsimut isigalugu innuttaasunik isumassuinerup atugarissaarnerullu nukittorsarneqarnissaannut periarfissaqarpoq. Nunap immikkoortuani inuusuttut amerlasuut atuarnermik ilinniarnermillu ingerlatsinissamut kajuminnerulersinneqarnissaannut immikkut suliniuteqarnissamut periarfissaqarpoq. Sumiiffimmi meeqqat inuusuttuaqqallu Kalaallit Nunaanni meeqqat inuusuttuaqqallu allat assigalugit ineriartornissamut periarfissaqartinniarlugit immikkut suliniuteqartoqarsinnaavoq. Sumiiffimmi avatangiisit suliniuteqarfiginissaannut aammalu suliffissaqarniarnikkut pissutsit annertusarneqarnissaannut periarfissaqarpoq. Sumiiffimmi innuttaasunik sullissinerup annertusarneqarnissaanut periarfissaqarpoq, taamaalilluni innuttaasut saaffiginnissutaat aammalu ajornartorsiutit aalajangersimasut pillugit nunaqarfinnit ataasiakkaanit saaffiginnissutit pisortatigoortumik akissuteqarfigineqarsinnaaqqullugit.
Suliniutit iliuusissallu ataatsimut nunap immikkoortuani atugarissaarnermut innuttaasunillu sullissinermut kivitsisinnaasut.
Aammattaaq ajornartorsiutit assigiinngitsut paasisassarsiorluni angalanermi paasineqartut ataatsimiititaliamit Inatsisartuni suleqatinut ingerlateqqinniarneqarput. Assersuutigalugu avatangiisinut tunngasut, inuussutissarsiornermut tunngasut ilinniartitaanermullu tunngasut il.il.
Ingerlatsinikkut oqartussaasut - kommuni Naalakkersuisullu - qanoq aammalu anguniakkat pingaarnersiuinerillu suut iluini pitsanngorsaasoqarsinnaanersoq pillugu aalajangersimasumik oqaloqatigiittariaqarput.
Upernavimmiinnerup saniatigut nunaqarfiit Kangersuatsiaq, Tasiusaq, Innaarsuit, Naajaat Aappilattorlu ataatsimiititaliamit tikeraarneqarput.
Nunaqarfiit avannarpasinnerusut Kullorsuaq, Nuussuaq Nutaarmiullu kiisalu nunap immikkoortuani nunaqarfik kujasinnerpaaq Upernavik Kujalleq sumiiffimmi anerorsuarnera pissutigalugu ataatsimiititaliamit ajoraluartumik tikinneqanngitsoorput.
Angalaqatigiit tikitaminni ilassiorluarneqarnerannut ataatsimiititaliaq qujavoq. Aammattaaq immikkut qujaffigineqassaaq Qaasuitsup kommunia sulisuilu tunniussimasut paasissarsiorluni angalanerup piviusunngortinneqarsinnaaneranut periarfissiisut.
Nunap immikkoortuani paasisassarsiorluni angalaneq ataatsimut isigalugu assut pissarsiffiulluarpoq aammalu Inatsisartuni naalakkersuinikkut sulinermi siunissami pingaarutilittut tunngavissiissalluni.
Annertunerusumik paasissutissat Ilaqutariinnermut Peqqissutsimullu Ataatsimiititaliamut ilaasortanit makkuninnga pissarsiarineqarsinnaapput:
Lars P Mathæussen, Siulittaasoq, mobil 24 17 88.
Knud Kristiansen, siulittaasup tullia, mobil 26 16 71
Juliane Henningsen, ilaasortaq, mobil 48 81 48
Agathe Fontain, ilaasortaq, mobil 48 45 31
Mimi Karlsen, ilaasortaq, mobil 58 76 19