2024 2023 2022 Flere år...
02-09-2014
Inatsisartut Aningaasaqarnermut Akileraartarnermullu Ataatsimiititaliaat missingersuutit pillugit ulluni 21.-26. august 2014-imi Upernavimmi isumasioqatigiippoq
Aningaasaqarnermut Akileraartarnermullu Ataatsimiititaliaq missingersuutit pillugit ulluni 21.-26. august 2014-imi Upernavimmi isumasioqatigeeqqammerpoq. Inatsisissatut siunnersuutip ukiumoortumik misissornerani nunatta immikkoortuisa assigiinngitsut tikeraarneqarnissaat ataatsimiititaliamit pingaartinneqarmat missingersuutit pillugit isumasioqatigiinnissami nunatsinni sumiiffinni assigiinngitsuni ingerlannissaa ataatsimiititaliap nalinginnaasumik toqqartarpaa.
2015-imut aningaasanut inatsisissatut siunnersuut Naalakkersuisunit saqqummiunneqareermat ataatsimiititaliap ullut taaneqartut atorlugit misissorpaa. Missingersuutit pillugit isumasioqatigiinnermi aningaasanut inatsimmi suliassaqarfiit assigiinngitsut ilaasortanit misissorneqartarput. Taamatut misissornera ingerlanneqartarpoq partiilersornertaqanngitsumik partiilu aallaavigalugu isummersornertaqanngitsumik, kisiannili Naalakkersuisut saqqummiussaat teknikip tungaanit isiginerullugu misissorneqarluni. Aningaasanut inatsisissatut siunnersuutip aallarniutaasumik taamatut misissornerani partiit isumaqatigiinniarneri ingerlanneqarneq ajorput.
Aningaasanut inatsisissatut siunnersuutip tamarmiusup ataatsimoortumik misissorneratigut Naalakkersuisunut apeqqutissat oqaaseqaatissalluunniit suliarineqarnissaat periarfissinneqartarpoq. Akissutit oktoberip aallartinnerata missaaniugunartoq tiguneqareerpata aningaasanut inatsisissamik suliarinninnini sukumiisoq Aningaasaqarnermut Ataatsimiititaliap ingerlateqqissavaa.
Aningaasanut inatsisissatut siunnersuut misissorneqareermat nunaqarfiit Upernaviup avannaatungaaniittut ilaat pissarsiviulluartumik tikeraarneqarput. Tasiusaq, Innaarsuit aammalu Aappilattoq ataatsimiititaliamit tikeraarneqarput piffissaqarnerlu naapertorlugu ilinniartitaanermut, pilersuinermut, aalisarnermut kiisalu eqqagassalerinermi peqqinnissamut nunaqarfinni tunngasut pillugit ajornartorsiutaasunik erseqqinnerusumik ilisimatinneqarluni.
Missingersuutit pillugit isumasioqatigiinneq ataatsimiititaliamit angusaqarfiullunilu pissarsiviulluarpoq. Aningaasanut inatsisissatut siunnersuutip misissorneqarnerani suleqatigiilluarneq Inatsisartuni naalakkersuinikkut suleqatigeqqinnissamut pingaarutilimmik tunngavissiivoq.
Paasissutissat annertunerusut pissarsiarineqarsinnaapput Aningaasaqarnermut Akileraartarnermullu Ataatsimiititaliap siulittaasuanut saaffiginnikkut:
Jens Immanuelsen, +299 52 21 10