2024 2023 2022 Flere år...
08-09-2014
2014-imi ukiaanerani ataatsimiinnissamut ullormut oqaluuserisassat naammassipput
2014-imi ukiaanerani ataatsimiinnissamut (UKA14) oqaluuserisassat septemberip arfineq-pingajuanni nassiunneqarput.
Inatsisartuni ukiaanerani ataatsimiinneq marlunngornermi ulloq 30. september 2014-imi nal. 11.00 aallartittussatut pilersaarutigineqarpoq ullorlu 12. december 2014-imi naammassineqartussatut pilersaarutigineqarluni.
Inatsisartunut ilaasortat oqaluuseritikkumasaat 65-t Naalakkersuisullu oqaluuseritikkumassat 43-t oqaluuserineqassapput.
Sapaatit akunnerini ullut ataatsimiiffissat agguataanneri imaapput:
- Sapaatip akunneranut ataatsimiiffiusussat ullut pingasuusassapput nal. ataatsinut aallartittassallutik (marlunngorneq, pingasunngorneq sisamanngornerlu), taamaattorli sapaatip akunnerini 46 aamma 50-imi pinnani, tamatumani tallimanngornerni 14. november aamma 12. decemberimi inersuarmi ataatsimiittoqassalluni.
- Tamatuma saniatigut pingasunngornerit tamaasa nalunaaquttap akunnera ataaseq nal. 11.00-imiit nal. 12.00-imut apeqquteqarfiusassaaq, tamatuma kingorna unillatsiartoqartassaaq nal. 13.00-imiit ataatsimiinneq nanginneqartassalluni. Akunneq apeqquteqarfiusoq siulleq ulloq 8. oktoberimi ingerlanneqassaaq.
- Sapaatip akunnera 44 inersuarmi ataatsimiittoqassanngilaq Nunat Avannarliit Siunnersuisoqatigiivini ataatsimiinnissaq pissutigalugu. Taamaattoq sapaatip akunnerani pineqartumi ataatsimiititaliat sulinerat allannguuteqaratik ingerlaannassapput.
UKA2014-imut atatillugu atortussat tamarmik Inatsisartut nittartagaanni inatsisartut.gl-imi takuneqarsinnaapput. Atortussat qarasaasiakkut ingerlaavartumik pisartagarineqarsinnaapput. Tamanna kissaatigigaanni Laila Kristiansen lkri@inatsisartut.gl attaveqarfigineqarsinnaavoq.
Lars-Emil Johansen
Inatsisartut Siulittaasuat
Paasissutissat annertunerusut Inatsisartut Siulittaasuat Lars-Emil
Johansenimut angallattagaq +299 55 19 15 attaveqarfigalugu
pissarsiarineqarsinnaapput.