Nutaarsiassat


2021 2020 2019 Flere år...

27-09-2014

Naalakkersuisut Siulittaasuata Namminersorlutik Oqartussanut akiligassarisimasai

Inatsisartut makku pillugit ilisimatinneqassasut Kukkunersiuinermut Ataatsimiititaliaq ullumi aalajangerpoq:

 

Kukkunersiuinermut Ataatsimiititaliaq kukkunersiuisumit Inatsisartunit toqqarneqartumit ilisimatitsissummik tigusaqarpoq, tassani allassimalluni Naalakkersuisut Siulittaasuat Namminersorlutik Oqartussanut 106.363,27 kr.-inik akiligassaqarsimasoq.

 

(Timmisartumut) bilitsinik nammineq atugassanik pisinikkut akiligassat pinngorsimapput, tamatumani Siulittaasup ilaqutaasa bilitsiinut kiisalu akunnittarfimmiinnerannut aningaasartuutit Namminersorlutik Oqartussanit akilerneqarsimallutik, tassungalu ilanngullugu neriniartarfimmi minibarimilu il.il. aningaasartuutit akilerneqarsimallutik. Aammattaaq Namminersorlutik Oqartussat ilassinninnermut iniutaanni katerisimaarnernut akiliisoqarsimasoq ilisimatitsissummi allassimavoq.

 

Akiligassat annerpaartaat Siulittaasup 2013-imi apriilip qiteqqunnerani sulilerneraneer-suusut kiisalu piffissami 2013-ip qiteqqunneranit 2014-ip qiteqqunneranut aningaasat akiitsorineqartut akilernissaat arlaleriarluni nukingisaarutigineqartarsimasoq paasissutissani Ataatsimiititaliamit pissarsiarineqartuni allassimavoq. Akiligassat ulloq 8. september 2014-imi akilerneqarsimapput.

 

Kukkunersiuisumit ilisimatitsissut tunngavigalugu ataatsimiititaliaq Naalakkersuisut Siulittaasuannut apeqqutinik arlalinnik nassiussaqarpoq. Ajornartorsiut ukiuni arlalinni, aamma siulittaasup ikkunnissaa sioqqullugu, atuussimasoq akissuteqaatit takutippaat. Taamaalilluni Naalakkersuisut siulittaasorisimasaat Namminersorlutik Oqartussanut  suli akilerneqanngitsunik arlaleriarlunilu akileqquneqartarsimasunik kr. 25.034-nik akiligassaqartoq oqaatigineqarpoq.

 

Ataatsimut isigalugu pisup assinganik Naalakkersuisut akornanni pisoqarnersoq pisoqarsimanersorluunniit qulaajarniarlugu kukkunersiuisoq Inatsisartunit toqqarneqartoq Naalakkersuisoqarfiit sinnerini  misissueqqullugu qinnuigineqassasoq paasissutissat tiguneqartut tunngavigalugit ataatsimiititaliaq aalajangerpoq.

 

Suliap ilungersunartuunera tunngaviusutullu isigineqartariaqarnera pissutigalugit suliaq pillugu Inatsisartunut immikkut ittumik ilisimatitsissuteqartoqassasoq ataatsimiititaliap aalajangerpaa.

 

 

Kristian Jeremiassen

Kukkunersiuinermut Ataatsimiititaliap siulittaasua

 

Annertunerusumik paasisaqarusukkaanni ataatsimiititaliap siulittaasua, mobil +299 54 06 94, attavigineqarsinnaavoq.