2024 2023 2022 Flere år...
03-10-2014
Inatsisartunut qinersinissaq taassumalu tungaanut ataatsimiititaliat sulinerat
Naluneqanngitsutut ulloq 1. oktober 2014 Inatsisartut aalajangerpaat Inatsisartunut ulloq 28. november 2014 qinersisoqassasoq. Taamaalillunilu 2014-imi ukiakkut nalinginnaasumik ataatsimiinneq taamaatinneqarpoq. Inatsisissatut aalajangiiffigisassatullu siunnersuutit kiisalu apeqquteqaat aallaavigalugu oqallinnissat naammassillugit suliarineqarsimanngitsut qinersinissap nalunaarutigineqarneratigut tamarmik atorunnaarput.
Qinersinissap nalunaarutigineqarneratigut Inatsisartut pisarnertut ingerlajunnaarput. Tamannattaaq atuuppoq ataatsimiititaliami sulinermut. Taamaattumillu tunngaviatigut qinersinissap tungaanut ataatsimiititaliami sulineq ingerlanneqassanngilaq. Aningaasaqarnermut Ataatsimiititaliamut tunngatillugu pissutsit immikkut ittut atuupput, tassa aningaasaliissuteqarnissamik suliassat politikimut tunngasumik imaqanngitsut kisimik ataatsimiititaliamit suliarineqarsinnaammata, taakku inuiaqatigiit ingerlanneqarnerat eqqarsaatigalugu kinguartinneqarsinnaanngippata, tamannalu ataatsimiititaliami tamarmiusumit isumaqatigineqarpat.
Qineqqusaarneq maanna aallartereersutut isigineqarpoq, taamaattumillu ilaasortanut naalakkersuinikkullu suliniaqatigiiffinnut tunngasut eqqarsaatigalugit allaffissornikkut aqutsinermullu nalinginnaasumik tunngasut kisimik Inatsisartut Allattoqarfiannit isumagineqarsinnaapput.
§ 37 naapertorlugu apeqqutit qinersinerup nalunaarutigineqarnerata kingorna akissuteqarfigineqarnissaat naatsorsuutigineqarsinnaassanngilaq. Taakkununnga aamma ilaapput apeqqutit qinersinissap nalunaarutigineqarnera sioqqullugu apeqqutigineqarsimasut.
Nunatta Karsiata naatsorsuutaasa kukkunersiorneqartarnerannut Inatsisartut ataatsimiititaliaata misissuisitsinera aallartereersoq ingerlaannassaaq. Misissuinermi paasisat qinersinerup kingorna Kukkunersiuinermut Ataatsimiititaliamut nutaamut saqqummiunneqarumaarput 2013-imut Nunatta Karsiata Naatsorsuutai pillugit isumaliutissiissuteqarnissaq eqqarsaatigalugu.
Siulittaasoqarfiup naggataatigut qinersinissamut qinigassanngortittunut partiinullu tamanut kaammattuutigaa ataqqeqatigiinneq naalakkersuinikkullu isummat assigiinngissinnaasarnerannik akuersaarneq tunngavigalugit torersumik ataqqinassuseqartumillu qineqqusaaqqullugit.
Ikinngutinnersumik inuulluaqqusillunga
Lars Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat Lars Emil
Johansen oqarasuaat 55 19 15 attaveqarfigalugu
pissarsiarineqarsinnaapput.