2024 2023 2022 Flere år...
10-10-2014
Inuusuttut 18-it 24-llu akornannik ukiullit 2015-imi Inuusuttut Inatsisartuinut peqataanissamut suli qinnuteqarsinnaapput
Inuusuttut 18-it 24-llu akornannik ukiullit 2015-imi Inuusuttut Inatsisartuinut peqataanissamut qinnuteqarsinnaasut Inatsisartut Allattoqarfiat ulloq 1. oktobarimi tusagassiorfinnut nalunaaruteqarpoq. Periarfissaq tamanna suli atuuppoq, tassami naak qinersinissamik nalunaaruteqartoqaraluartoq Inuusuttut Inatsisartui 2015 ingerlanneqassammata. Peqataanissamut qinnuteqarsinnaanermut ulloq 31. oktober 2014 killiliunneqarpoq.
"Inuusuttut akornanni suliffissaaleqineq" Inuusuttut Inatsisartuini sammineqassaaq: "Inuusuttut akornanni suliffissaaleqinermik ajornartorsiut annertusiartortoq qanoq iliuuseqarfigisinnaavarput?". Sammisamut paasissutissat erseqqinnerusut, pisussanut pilersaarutit peqataasinnaanermullu piumasaqaatit nittartakkami inu.gl-imi nassaarineqarsinnaapput. Tamatuma saniatigut Facebookimi qupperneq aaqqissuussaq sioqqullugu sammisaq pillugu oqalliffiusinnaallunilu isummersorfiusinnaasoq pilersinneqarsimavoq.
Oqallinneq aallartereerpoq. Oqallinnermi peqataaniaruit toqqaannartumik iserfigiuk www.facebook.com/inu2015.
Inatsisartut oqartussaaqataanerlu pillugit peqataasut tunngaviusumik ilisimasaannik annertusaanermik, inuusuttut akornanni suliffissaaleqineq pillugu oqallinnermik malitseqartillugu pisussanut pilersaarut aallarniuteqartillugu suliarineqarsimavoq. Isiginnaagassiamik takutitsisoqassaaq, nalorsitsaarisoqarluni, sammisamut immikkut ilisimasalinnit saqqummiussisoqarluni Inatsisartullu ataatsimiittarfianni, siunnersuutinik suliarisimasanik saqqummiussiviusumik illersuiffiusumillu, ataatsimiittoqarluni. Peqataasullu pisarneq malillugu naggataagut inaarutaasumik nalunaarummik Inatsisartut Naalakkersuisullu Siulittaasuinut tunniussissapput.
Katillugit peqataasunut 36-inut inissaqartitsisoqarpoq. Nittartakkakkut ini.gl-ikkut oqarasuaammulluunniit (iPhonemut Androidimulluunniit) inu.gl-ip app-ia aariarlugu peqataanissamut qinnuteqartoqarsinnaavoq. Ingerlaqqiffiusumik ilinniarfiit, atuagaateqarfiit tamarmik kiisalu inuusuttut kattuffiat Sorlak allagartarsuarmik, aaqqissuussamik nalunaarutiginnittumik, inu.gl-illu app-ianut ingerlaqqiffissiamik toqqaannartumik pilerneqarsimasumik, nassinneqarput. Tamatuma saniatigut KNR qaammat oktoberi tamaat 2015-imi Inuusuttut Inatsisartui pillugit ussassaarummik aallakaatitsisassaaq.
Inussiarnersumik inuulluaqqusilluta
Inatsisartut Allattoqarfiat
Erseqqinnerusumik paasisaqarumalluni uunga saaffiginnittoqarsinnaavoq: Paasissutissiisarnermik suliniutinillu suliaqartoq Nils Baum oqarasuaat 34 61 14.