Nutaarsiassat


2021 2020 2019 Flere år...

18-10-2014

Ilaasunik assartuussinemi kiffartuunneqarnissamik isumaqatigiissuteqarnissaq pillugu suliaq Inatsisartut Aningaasaqarnermut Akileraartarnermullu Ataatsimiititaliaata naammassillugu suliaraa

Suliaq siuliani taaneqartoq Aningaasaqarnermut Akileraartarnermullu Ataatsimiititaliap naammassillugu suliareqqammerpaa. Kiffartuunneqarnissamut isumaqatigiissutinik nutaanik isumaqatigiissuteqarnissamut isumaqatiginninniarnerit inernerisa akuersissutigineqarnissaat pillugu inassuteqaat nassiunneqartoq ataatsimiititaliamit akuerineqanngitsoq ataatsimiitita­liap 14. oktober allagaqarluni Naalakkersuisunut nalunaarutigaa. Taarsiullugu kiffartuussi­nissamik isumaqatigiissutit atuuttut ukiumik ataatsimik sivitsorneqarnissaannik isumaqati­giissuteqarnissami isumaqatigiinniarnerit inernerisa akuerineqarnissaat pillugu inassute­qaammik Naalakkersuisut nassiusseqqullugit ataatsimiititaliap isumaqatigiittup qinnuigai.

 

Kiisalu Naalakkersuisut inassuteqaataata siulliup tiguneqarnerata kingorna qinersinissamik nalunaaruteqartoqarpoq Ataatsimiititaliap Naalakkersuisullumi iliuuseqarsinnaanerannik killiliisumik. Tamatuma peqatigisaanik aningaasaliissutinut inatsisaagallartoq Inatsisartunit akuerineqarpoq, tassani Aningaasaqar­nermut Akileraartarnermullu Ataatsimiititaliamit akuerineqartumik kiffartuussinissamut isumaqatigiissuteqarnissamut Naalakkersuisut piginnaatinneqarput. Taamatut akisussaaqa­taaneq ataatsimiititaliamit soorunami pimoorunneqarpoq suliarlu - suliat ataatsimiititaliamut innersuunneqartut allat assigalugit - akueriinnarnagu misissorluaqqaarluguli kiisalu erseqqissumik isummersorluni suliarineqarluni. Suliami pineqartumi ataatsimiititaliap isumaqatigiittup isummius­sani allanngortinngikkaa ataatsimiititaliamit Naalakkersuisunut nalunaarutigineqarpoq.

 

Taamaalillunilu kiffartuussinissamik isumaqatigiissutit atuuttut sivitsorneqarnissaannik kis­saatini ataatsimiititaliap isumaqatigiittup aalajangiusimavaa, tamatumalu peqatigisaanik taa­matut sivitsuinerup kingunerisassai pillugit Naalakkersuisut nassuiaataat tusaatissatut tigul­lugu. Ilaatigullu Air Greenland-imi sulisunik atorfinitsitseqqiiniarnerit Ataatsimiititaliamit naammagisimaarneqarluni. Naalakkersuisut inassuteqaataat ataatsimiititaliamit ippassaq tiguneqarpoq nukinginnartutullu suliarineqarluni. Inassuteqaatiminni kingullermi ataatsi­miititaliap kissaataa Naalakkersuisut malissimammassuk ataatsimiititaliap iluarisimaarlugu maluginiarpaa.

 

Ataatsimiititaliap aalajangiiniarnermini imaannaanngitsorsiorsimanera arlalinnik pissuteqar­poq. Ataatsiimiititaliarmi isumaqarmat suliaq taama pingaaruteqartigisoq taama sivikitsigi­sumik piffissaqarluni suliarineqarsinnaanngitsoq, tassami apeqqutit pisariaqartut paasinarsi­sitsisussallu Naalakkersuisunut apeqqutigineqarnissaat piffissamik atuiffiusariaqassammat. Suliap kinguartinneqarsinnaannginnera nukinginnartuuneralu pissutigalugit naatsorsuutigi­neqartutut sivikitsigisumik piffissalerneqarluni suliaq suliarineqarsinnaanngitsutut ataatsi­miititaliamit isigineqarsimavoq. Tamatumalu peqatigisaanik Naalakkersuisunngorumaartut ukiuni pingasunit tallimanut sivisussuseqartumi pituttorneqarnissaat ataatsimiititaliamit pinaveersimatinniarneqarsimavoq. Pissutsit tamakku tunngavigalugit suliami aalajangiitin­nani politikikkut isumaqatigiittoqarnissaata qulakkeerneqarnissaa ataatsimiititaliamit eqqor­nerpaatut isigineqarsimavoq. Tamannalu tunngavigalugu Naalakkersuisut aappassaanik inas­suteqaateqareerneranni kiffartuussinissamik isumaqatigiissutit atuuttut sivitsorneqarnissaan­nik kissaatini ataatsimiititaliap aalajangiusimasimavaa.

 

Paasissutissat annertunerusut Aningaasaqarnermut Akileraartarnermullu Ataatsimiititaliap siulittaasuanut Jens Immanuelsenimut uunga saaffiginninnikkut pissarsiarineqarsinnaapput: +299 52 21 10.