Nutaarsiassat


2021 2020 2019 Flere år...

07-11-2014

Misissuisitsineq Kukkunersiuinermut Ataatsimiititaliaasimasup Deloittemit inniminnersimasaa pillugu paasissutissat

Minnerunngitsumik ulluni kingullerni innuttaasut akornannit kissaateqartoqartarsimavoq misissuinermit nalunaarusiap Kukkunersiuinermut Ataatsimiititaliaasimasup Deloittemut suliareqqusimasaata tamanut saqqummiunneqarnissaanik. Misissuinermi piffissap 2009-mi januaarip ulluisa aallaqqaataanniit 2013-imi decembarip ulluisa 31-iannut pineqarnissaa naatsorsuutigineqarpoq, ullumikkut siusinnerusukkullu Naalakkersuisunut ilaasortaasimasut immikkut sammillugit, tamatumalu saniatigut Deloitte nammineq naliliinini malillugu pissutsit allat attuumassuteqarsinnaasut pisariaqarpat ilanngussinnaallugit. Inatsisartut Allattoqarfiat sinnerlugu matumuuna ilisimatitsissutigineqassaaq qinersinerup kingorna Kukkunersiuinermut Ataatsimiititaliamik nutaamik qinersisoqarnissaata tungaanut inatsisitigut periarfissaqanngimmat misissuinermit nalunaarusiap tamanut saqqummiunnissaanut.

 

Qinersinissamik nalunaaruteqarnerup nunatta aqunneqarnera eqqarsaatigalugu inatsisitigut malitsigaa Inatsisartut atuukkunnaarnikuummata. Taamaalilluni Kukkunersiuinermut Ataatsimiititaliaq aamma atuukkunnaarnikuuvoq. Taamaattumik Inatsisartut Kukkunersiuinermullu Ataatsimiititaliaq tamarmik misissuinerup inernerata tamanut saqqummiunneqarnissaanik aalajangiisinnaassuseqanngillat, soorlu aamma Inatsisartut Kukkunersiuinermulluunniit Ataatsimiititaliaq isumaliutissiissuteqarsinnaanatillu allatigut naalakkersuinikkut sulisinnaanngitsut. Tamanna qinersinissamik nalunaaruteqarnerup inatsisitigut malitsigaa, tamannalu inatsisitigut pissutsit ullumikkutut itsillugit Inatsisartut Siulittaasoqarfiata, Inatsisartut Allattoqarfiata, partiit siulittaasuisa, Inatsisartuusimasunut ilaasortat allalluunniit allanngortissinnaanngilaat.

 

Tamatumunnga atatillugu erseqqissarneqartariaqarpoq matumani nutaamik aalajangerneq nutaamilluunniit paasinninneq pineqanngimmata. Misissuinerup qinersinissaq sioqqullugu tamanut nalunaarutigineqannginnissaa taamaalilluni innuttaasunut erseqqilluinnartumik 2014-imi oktobarip ulluisa pingajuanni nalunaarutigineqareerpoq, taamanikkummi Inatsisartut siulittaasorigallagaat tusagassiorfinnut nalunaaruteqarmat ilaatigut ima oqaasertalimmik:

 

(Issuaaneq aallartippoq:)

"Qinersinissap nalunaarutigineqarneratigut Inatsisartut pisarnertut ingerlajunnaarput. Tamannattaaq atuuppoq ataatsimiititaliami sulinermut. Taamaattumillu tunngaviatigut qinersinissap tungaanut ataatsimiititaliami sulineq ingerlanneqassanngilaq. Aningaasaqarnermut Ataatsimiititaliamut tunngatillugu pissutsit immikkut ittut atuupput, tassa aningaasaliissuteqarnissamik suliassat politikimut tunngasumik imaqanngitsut kisimik ataatsimiititaliamit suliarineqarsinnaammata, taakku inuiaqatigiit ingerlanneqarnerat eqqarsaatigalugu kinguartinneqarsinnaanngippata, tamannalu ataatsimiititaliami tamarmiusumit isumaqatigineqarpat.

...

Nunatta Karsiata naatsorsuutaasa kukkunersiorneqartarnerannut Inatsisartut ataatsimiititaliaata misissuisitsinera aallartereersoq ingerlaannassaaq. Misissuinermi paasisat qinersinerup kingorna Kukkunersiuinermut Ataatsimiititaliamut nutaamut saqqummiunneqarumaarput 2013-imut Nunatta Karsiata Naatsorsuutai pillugit isumaliutissiissuteqarnissaq eqqarsaatigalugu."

(Issuaaneq naavoq)

 

Uppernarsarneqarsinnaavoq misissuisitsineq Kukkunersiuinermut Ataatsimiititaliaasimasup inniminnersimasaa Deloittep naammassisimammagu. Misissuisitsinerup inernera Kukkunersiuinermut Ataatsimiititaliaasimasoq sinnerlugu Allattoqarfimmit tiguneqaannarsimavoq allakkat puuannut matoqqasumut ikillugu, ingerlaannarlu tiguneqarnermi kingorna ammarneqarani GrønlandsBankenimi aningaaserivimmi ilisivimmut parnaartartumut ilineqarluni. Taamaalilluni Inatsisartut Allattoqarfianni inatsisartunulluunniit ilaasortaasimasut arlaannaalluunnit sunnguamilluunniit periarfissaqarsimanngilaq nalunaarusiap atuarnissaanut.

 

Misissuinerup matuma Kukkunersiuinermut Ataatsimiititaliap inniminnigaata suliarineqarnera qinersinissamik nalunaaruteqartoqareernerata kingorna suliassat allat suliarineqartarnerannit allaassuteqanngilaq. Assersuutitut ilaatigut taaneqarsinnaavoq Inatsisartut Ombudsmandiannit Inatsisinut Ataatsimiititaliamut nalunaarutaajunnartut aatsaat novembarip ulluisa 28-ianni Inatsisartunut qinersisoqareernerata kingorna Inatsisinut Ataatsimiititaliamut nutaamut saqqummiunneqarsinnaammata.

 

Taamaalilluni nalunaarusiap tamanut saqqummiunnissaanut periarfissatuaavoq qinersinerup kingorna Kukkunersiuinermut Ataatsimiititaliap pilersinneqarnerata kingorna ataatsimiititaliap nalunaarusiaq saqqummiutissappagu. Tamannalu ataatsimiititaliap suleriaasia malillugu piumasaqaatitaqarpoq Naalakkersuisut siumut tusarniarneqaqqaarnissaannik, tamatumunngalu peqatigitillugu oqaatigineqassalluni Naalakkersuisuugallartut atuuttut taamatuttaaq misissuinermut oqaaseqaateqarsinnaassanngikkaluarmata, inatsisartunngortussat kukkunersiuinermut ataatsimiititaliamik nutaamik pilersitsinissaat sioqqullugu nalunaarusiap tamanut saqqummiunneqarnissaannik aalajangiisoqarsinnaasimassagaluarpat.

 

Allattoqarfik taamaalilluni suliassami sukumiineusumik oqaassissaqanngilaq, Kukkunersiuinermulli Ataatsimiititaliamik nutaamik toqqaanissaq utaqqineqarluni.