Nutaarsiassat


2021 2020 2019 Flere år...

27-11-2014

Naalakkersuisut september 2014-imi missingersuutinik malittarinninnerat Inatsisartut Aningaasaqarnermut Ataatsimiititaliaata ullumi oqaluuseraa

September 2014-imi missingersuutinik malittarinninneq Aningaasaqarnermut Ataatsimiitita­liamit ullumi oqaluuserineqarpoq. Missingersuutinik malittarinninnerup imarai 2014-imi qaammatini siullerni qulingiluani isertitat aningaasartuutillu misissuiffigineqarnerat.

 

Inatsisartut ukiakkut ataatsimiinnerannut atatillugu missingersuutinik malittarinninnermik taamaattumik Naalakkersuisut saqqummiussinissaat inatsisitigut aalajangersarneqartumik suliakkiissutaavoq. Ataatsimiititaliap isumaa malillugu Inatsisartunut qinersinissamik nalu­naaruteqarneq tamatuminnga allanngortitsinngilaq, tassa Aningaasaqarnermut Akileraar­tarnermullu Ataatsimiititaliaq, Inatsisartut ataatsimiititaliaannit kisiartaalluni ingerlasutut, suliassaminik isumaginnittussaammat. Taamatuttaaq Naalakkersuisuugallartut Namminer­sorlutik Oqartussat susassaqarfiisa aqutsiviginissaat aammalu atorfimmi suliassat ingerlaannarnissaannut pisariaqartunik suliaqarnissaq pisussaaffigaa. Naalakkersuisoqarfim­mi missingersuutinik malinnaaneq atuinerusoqaratarsinnaaneranik takutitsippat aningaa­saliissutit eqquutsinneqarnissaannut qulakkeerinnittussanik Naalakkersuisup pisariaqartunik iliuuseqartussaanera Inatsisartunut qinersinissamik nalunaaruteqarnerup allanngortinngilaa.

 

Missingersuutinut inatsimmut nassuiaatini allassimavoq missingersuutit pillugit ilisimatitsis­summik saqqummiinermi siunertaq tassaasoq taassuma Namminersornerullutik Oqartussat aningaasaqarnerannut akisussaassuseqartunit soqutigisaqartunilluunniit tamanit atuarneqar­sinnaallunilu atorneqarsinnaanissaa. Anguniagaq taanna eqquutsivinneqarsimasorinanngilaq. Taamaalillunilu Aningaasaqarnermut Akileraartarnermullu Ataatsimiititaliamit maluginian­ngitsoorneqanngilaq Danmarkimit ataatsimoortumik tapiissutit naatsorsuuserinikkut suliari­neqarnerat innuttaasunit nalornissutigineqarsimammat. Naalakkersuisulli Danmarkimit ataatsimoortumik tapiissutinik naatsorsuuserinikkut suliarinninnerannik qularutiginninnissa­mut ataatsimiititaliaq tunngavissaqanngilaq. Taamaalillunilu ataatsimiititaliap ilisimavaa Danmarkimit ataatsimoortumik tapiissutit qaammatikkaartumik siumut tunniunneqartartut aammalu piffissami missingersuutinik malinnaaffiusumi pissarsiassat marluk suli amigaataasut, tamannalu pissusissamisoorpoq.

 

Ingerlatsinermut aningaasaliissutit, tapiissutitut aningaasaliissutit inatsisitigullu pisussaaffi­galugit aningaasaliissutit missingersuutinut sanilliullugit annertunerusumik nikingassute­qarnissaat naatsorsuutigineqanngimmat Aningaasaqarnermut Akileraartarn ermullu Ataatsimiititaliamit tusaatissatut tiguneqarpoq. Tamatuma peqatigisaanik 2014-imi tamak­kiisumik isertitassat assut isumakulunnarnerannik Naalakkersuisut oqarnerat ataatsimiiti­taliamit isumaqataaffigineqarpoq. Kisitsisit ajorsiartornerat kisiat eqqarsaatiginagu, aammali missingersuutit taama annertutigisumik uniorneqarsinnaanerat eqqarsaatigalugu. Tamatuma kingunerinngitsoorsinnaanngilaa 2015-imi aningaasanut inatsisissatut siunnersuummik suliarinninnermut atatillugu suliassarput annertummat.

 

 

Paasissutissat annertunerusut Aningaasaqarnermut Akileraartarnermullu Ataatsimiititaliap siulittaasuanut,Jens Immanuelsenimut una atorlugu saaffiginninnikkut pissarsiarine­qarsinnaapput: +299 52 21 10