Nutaarsiassat

30-12-2014

Naalakkersuisunut ilaasortat piffissami 2009-2014-imi Namminersorlutik Oqartussanut akiligassaat pillugit kukkunersiuisut nalunaarusiaannut Naalakkersuisut oqaaseqaataannut tunngasumik Kukkunersiuinermut Ataatsimiititaliaq allakkanik tigusaqarpoq.

Kukkunersiuinermut Ataatsimiititaliaq Naalakkersuisut siulittaasuannit juulliaraq aqaguttoq  kingusissukkut allakkanik imatut imalinnik tigusaqarpoq:

"Taamaattorli Naalakkersuisut nutaat iverteqqammernerat, juullip ukiortaallu akornanni ulapaarneq, naalakkersuisoqarfinnut tusarniaaneq kiisalu akissutit nutsernerat pissutigalugit Naalakkersuisut aatsaat nalunaarusiamut oqaaseqaatitik tallimanngornermi 16. januar nassiussinnaavaat."

Allakkani taakkunani allassimavoq nalunaarusiap kikkunnit tamanit soqutigineqarnera eqqarsaatigalugu Naalakkersuisut oqaaseqaataasa tiguneqannginnerini nalunaarusiaq tamanut saqqummiuteqqullugu Kukkunersiuinermut Ataatsimiititaliaq kaammattorneqartoq.

Tamanna Kukkunersiuinermut Ataatsimiititaliap juullip ingerlanerani oqaloqatigiissutigaa aammalu nalunaarusiap tamanut saqqummiunneqarnissaani Naalakkersuisut oqaaseqaateqarnissaat utaqqimaarneqassanngitsoq Kukkunersiuinermut Ataatsimiititaliaq isumaqatigiittoq aalajangerluni. Tassunga atatillugu Kukkunersiuinermut Ataatsimiititaliamit oqaatigineqassaaq Naalakkersuisut piffissaliunneqartup iluani nalunaarusiamut oqaaseqaateqarsinnaannginnerat ajuusaarutigineqarmat.

Taamaakkaluartoq Kukkunersiuinermut Ataatsimiititaliaq isumaqarpoq nalunaarusiaq amigartumik tunngavissaqarluni oqaaseqaateqarfiginiarnagu, taamaattumillu naliliinissaminut isummernissaminullu Naalakkersuisut oqaaseqaataasa tiguneqarnissaat utaqqimaarniarlugu. Taamaalilluni kukkunersiuisut avataaneersut Inatsisartunit toqqarneqartut paasissutissiissutaannut inerniliussaannullu Naalakkersuisut isumaqataanerat kiisalu nalunaarusiaq Kukkunersiuinermut Ataatsimiititaliamut qanoq isumaliuteqalersitsinersoq oqaaseqaateqartitsissanersorlu suli ilisimanagit nalunaarusiaq maannamut atuarneqartariaqassaaq.

Inatsisinik atuuttunik malinninnissaq aammalu pisortat ingerlatsineranni naalakkersuinikkullu suliaqarnermi sapinngisamik annertunerpaamik ammasuunissamik Inatsisartut kissaataat naapertorlugu tamatuma pinissaanut peqataaqataanissaq Kukkunersiuinermut Ataatsimiititaliamit qitiutillugu pingaartinneqarpoq.

Randi V. Evaldsen
Kukkunersiuinermut Ataatsimiititaliap siulittaasua

Paasissutissat sukumiinerusut Kukkunersiuinermut Ataatsimiititaliap siulittaasua Randi V: Evaldsen +299 54 72 12 attaveqarfigalugu pissarsiarineqarsinnaapput.

Ilanngussat:

• Naalakkersuisut 23. december 2014-imi Kukkunersiuinermut Ataatsimiititaliamut allagaat,
• Naalakkersuisunut ilaasortat piffissami 2009-2012-imi Namminersorlutik Oqartussanut akiligassaqarnerannik misissuineq 3. November 2014-imeersoq aamma Naalakkersuisunut ilaasortat Namminersorlutik Oqartussanut akiligassaasa 7. november 2014-imi malitseqartinneqarnerat.