Nutaarsiassat

06-02-2015

2015-imi Upernaanerani ataatsimiinnissamut ullormut oqaluuserisassat naammassipput

Inatsisartuni upernaanerani ataatsimiinneq tallimanngornermi martsip ulluisa arfernanni 2015-imi nal. 13.00 aallartittussatut pilersaarutigineqarpoq sisamanngornermilu maajip ulluisa 28-ianni 2015-imi naammassineqartussatut pilersaarutigineqarluni.

Inatsisartunut ilaasortat oqaluuseritikkumasaat 60-t Naalakkersuisullu oqaluuseritikkumasaat 37-t aamma Inatsisartut Siulittaasoqarfiata oqaluuseritikkumasaat pingasut aammalu Inatsisinut Ataatsimiititaliap oqaluuseritikkumasaat ataaseq kiisalu Nunat Avannarliit Killiit Siunnersuisoqatigiiffiata kaammattuutitut aalajangersagai marluk oqaluuseritikkumavaat. Tassalu ataatsimut katillugit immikkoortut 103-t oqaluuserisassanngortinneqarput.

Sapaatit akunnerini ullut ataatsimiiffiusut ima agguataagaapput:

• Sapaatip akunneranut nal. 13:00 aallartilluni ullut ataatsimiiffiusut pingaasuusassapput (marlunngornerit, pingasunngornerit sisamanngornerillu), taamaattorli sap. ak. 14-imi 15-ilu ataatsimiittoqassanani poorskikkunni sulinngiffeqarneq pissutigalugu. Sap. ak. 19-imi ataasinngornermi ulloq 4. maj marlunngornermilu ulloq 5. maj ataatsimittoqassaaq. Pingasunngornermi sisamanngornermilu 6. aamma 7. maj Sulisitsisut Peqatigiiffiata aaqqissuussinera Future Greenland pilersaarutigineqarpoq.
• Tamatuma saniatigut pingasunngornerit tamaasa piffissami nal. 11:00-imiit 12:00-imut sapaatip akunnittaartumik Naalakkersuisunut apeqquteqartoqartarsinnaassaaq, tamanna pereeraangat ataatsimiinnerup nal. 13:00 aallartinnissaata tungaanut unillatsiartoqartarluni. Akunneq apeqquteqarfiusinnaasoq siulleq ulloq 11. marts ingerlanneqassaaq.  

UPA2015-imut atatillugu atortussat tamarmik Inatsisartut nittartagaanni www.inatsisartut.gl-imi takuneqarsinnaallutillu aaneqarsinnaapput. Erseqqissaatigineqassaaq atortussat qarasaasiakkut ingerlaavartumik nalunaarutigineqaannartassammata. Atortussallu aalajangersimasut kissaatigigaanni Laila Kristiansen E-mail-ikkut lkri@inatsisartut.gl attaveqarfigineratigut piniarneqarsinnaapput.

Lars-Emil Johansen
Inatsisartut Siulittaasuat

Paasissutissat annertunerusut Inatsisartut Siulittaasuat Lars-Emil Johansenimut angallattagaq +299 55 19 15 attaveqarfigalugu pissarsiarineqarsinnaapput.