2024 2023 2022 Flere år...
11-02-2015
Inuusuttut Inatsisartui sisamanngorpat aallartissapput
Sapaatip akunnerani uani sisamanngornermi 2015-imi Inuusuttut Inatsisartui aallartissapput. Ulluni sisamani aaqqissuussamut inuusuttut 35-it 18-it 24-illu akornanni ukiullit peqataassapput. Tamatumuuna peqataasunit 35-nit peqataasut 25-t illoqarfinnit nunaqarfinnillu Nuup avataaneersuupput. Peqataasut assigiinngitsunik tunuliaqutaqarput, ilaat ilinniakkamik ingerlatsisuupput ilaallu aalajangersimasumik suliffeqartuullutik suliffeqalernissamulluunniit sungiusartuullutik.
Inuusuttut taakku ulluni sisamani Inatsisartoqarneq tamallu oqartussaaqataanerat ilinniassavaat oqartussaaqataanermilu ingerlaatsimik misiliissallutik. Inuusuttut Inatsisartuinik 2013-imi februarimi ingerlatsineq aallarnerfigalugu ilinniartitsissutitut ilisimasanik ingerlatseqqinnissaq qitiutinneqarpoq, tassani inuusuttut namminneq isummersinnaalernissartik taakkuninngalu oqartussaaqataanermi maleruagassat tunngavigalugit illersuisinnaanissartik ilinniassallugu.
Inuusuttut Inatsisartuisa ukioq manna sammisassaat tassaavoq "Inuusuttut akornanni suliffissaaleqineq: inuusuttut suliffissaqannginnerannik ajornartorsiut annertusiartortoq qanoq iliuuseqarfigisinnaavarput?"
Inuusuttut Inatsisartui sapaatiuppat Inatsisartut ataatsimiittarfianni tamanut ammasumik nalunaaquttap akunnerini marlunni ingerlanneqartumik oqallinnermik naggaserneqassapput. KNR-ip sapaatiuppat nal. 13.00-imiit KNR 2-kut oqallinneq toqqaannartumik aallakaatissavaa. Tamatuma kingorna inuusuttut partiinit Inatsisartunut ilaasortaatitaqartunit tamanit aallartitamik ataatsimik minutsini 90-ini oqalliseqateqassapput. Taamaaliornikkut naalakkersuinerup silarsuaanut piviusumut ataqatigiissitsineq qulakkeerneqassalluni.
Aamma inu.gl/oqallinneq aqqutigalugu oqallinneq malinnaaffigineqarsinnaavoq. Pisussanut pilersaarut immikkuualuttortanik imaqartoq Inuusuttullu Inatsisartui pillugit paasissutissat attuumassutillit allat aamma inu.gl-imi nassaarineqarsinnaapput.
Lars-Emil Johansen
Inatsisartut Siulittaasuat
Paasissutissat annertunerusut Inatsisartut Siulittaasuannut Lars Emil Johansenimut oqarasuaammut 55 19 15-imut saaffiginnilluni pissarsiarineqarsinnaapput. Apeqqutit pisussanut teknikimullu tunngassutillit pillugit paasissutissiisarnermut suliniutinullu suleqataasoq Nils Baum oqarasuaammut 34 61 14-imut saaffigineqarsinnaavoq.