2024 2023 2022 Flere år...
13-02-2015
KNR-ip Radiukkut aallakaatitsisarfimmik pisinera unammilleqatigiinnermut innarliisinnaanerluni?
Nuummi radiukkut aallakaatitsisarfimmik KNR-ip pisinera Kultureqarnermut, Ilinniartitaanermut, Ilisimatusarnermut, Ilageeqarnermullu ataatsimiitsitaliamit tupigusuutigalugu malinnaaffigineqarpoq. Tusagassiorfiup Namminersorlutik Oqartussanit aningaasalersorneqartup sammisami sakkortuumik unammilleqatigiiffioreersumi radiukkut aallakaatitsisarfimmik pisinera ataatsimiititaliamit tunngaviatigut ajuusaarnartutut isigineqarpoq.
Takuneqarsinnaagunarpoq pisinermi kalaallit nunaanni inuussuttut anguniarneqartut. Ataatsimiititaliamilli qularutigineqarpoq, siunertamut taamatut ittumut radiukkut aallakaatitsissummik illoqarfiit annersaannaanut atorneqarnissaa. Peqatigalugu apeqqutinngortoq tassaavoq piffimmi aalajangersimasumiinnaq KNR-ip aallakaatitsisarnissani siunertarineraa imaluunniit radiukkut aallakaatitsisarfimmiit nuna tamakkerlugu aallakaatitsisarniarnersoq ? Tamatumalu saniatigut Peqatigisaanik pisinerup unammilleqatigiinnermut sunniutigisinnaasai ataatsimiititaliamit takujuminaatsinneqarput - assersuutigalugu KNR radiukkut aallakaatitsisarfik pineqartoq atorlugu ussassaarutinik tuniniaanermi suliffeqarfimmik unammillerfiusumik ingerlatsissava? Apeqqutaasorli unaavoq, tusagassiorfiup inuttaasunut sullissisup nunattalu karsianit annertuumik taperneqartartup taamatut illoqarfimmi ataatsimi namminersortunut sullissinermut ilanngunnera ataatsimut isigalugu pissusissamisoortuunersoq.
Ataatsimiititaliaq aalajangerpoq suliaq malinnaaffigeqqissaassallugu. Tamatumunnga atatillugu Kultureqarnermut, Ilinniartitaanermut, Ilisimatusarnermut, Ilageeqarnermullu Naalakkersuisumut paasissutissanik arlalinnik ataatsimiititaliaq ujartuiniarpoq, taamaalilluni tunisinermi inatsisinik atuuttunik kalluaasinnaaneq umannilleqatigiinnermilu innarliisinnaanerit qulaajaavineqarniassammata.
Steen Lynge
Kultureqarnermut, Ilinniartitaanermut, Ilisimatusarnermut, Ilageeqarnermullu Ataatsimiititaliami siulittaasoq
Annertunerusumik paasisaqarusukkaanni saaffigineqarsinnaavoq ataatsimiititaliap siulittaasuanut Steen Lynge-mut oqarasuaammut angallattakkamut23 98 23sianerluni pissarsiarineqarsinnaapput.