2024 2023 2022 Flere år...
16-02-2015
2015-imi Inuusuttut Inatsisartui aammarlutik iluatsilluartut
2015-imi Inuusuttut Inatsisartuinik taallugit aaqqissuussineq peqataasunit 34-usunit isumalluarfigineqarsimaqisoq sapaatip akunnerata naanerani ingerlanneqarpoq. Inuusuttut Inatsisartuisa katersuunnerat sapaatiummat ualikkut Inatsisartut ataatsimiittarfianni ataatsimiinnermik "Inuusuttut akornanni suliffissaaleqineq: Inuusuttut suliffissaqannginnerannik ajornartorsiut annertusiartortoq qanoq iliuuseqarfigisinnaavarput?" pillugu inaarutaasumik nalunaaruteqarnermik naggaserneqarpoq.
Ataatsimiinnermi oqaluuserisassani siunnersuutit 20-usimapput allannguutissatullu siunnersuutit 14-usimallutik, taakkunannga siunnersuutit 16-it naggataatigut akuersissutigineqarlutik.
Inuusuttut Inatsisartuisa naapisinneqartarneranni siullermeerutaasumik ataatsimiinneq malitseqartinneqarpoq partiit Inatsisartunut ilaasortaatitaqartut sinniisaannik oqalliseqateqarnermik. Tamatumani inuusuttut assut apeqqutissaqarsimapput, partiillu sinniisaasa piffissap killeqarnerujussua pissutigalugu apeqquterpassuit tamakkerlugit akissuteqarfigisinnaasimanagit.
Inaarutaasumik nalunaarutip Inatsisartut siulittaasuannut Lars-Emil Johansenimut Naalakkersuisullu siulittaasuannut Kim Kielsenimut tunniunneqarneranut atatillugu aaqqissuussineq peqataasunit assut iluarisimaarneqarpoq. Inuusuttut Inatsisartuinut ilaasortaq 21-nik ukiulik Aqqalooraq Joelsen Qaqortumeersoq ippassaq unnukkut Hans Egedep Illuani peqataasunit allanit nuannaarutigineqaqisumik inaarutaasumik nalunaarummik tunniussisuuvoq. Peqataasunit inuusuttut 25-it Nuup avataaneersuupput.
Inuusuttut Inatsisartuinit inaarutaasumik nalunaarut tusagassiorfinnut nalunaarummut matumunnga ilanngunneqarpoq, taamatullu aamma aqagu ulluop ingerlanerani assitalerlugu inuusuttut inatsisartuisa nittartagaannut wwww.inu.gl-imut ilanngunneqarumaarluni. Tassani aamma Inuusuttut Inatsisartuisa ataatsimiinnerat takoqqinneqarsinnaavoq paasissutissallu attuumassutillit allat nassaarineqasinnaallutik.
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat Lars-Emil Johansen oqarasuaat 55 19 15 attaveqarfigalugu pissarsiarineqarsinnaapput.