2024 2023 2022 Flere år...
16-03-2015
Meeqqanik inuusuttunillu inuuniarnikkut ulorianartorsiortunik sumiginnaaneq annilaarnartoq
Pisortat meeqqanik inuusuttunillu inuuniarnikkut ulorianartorsiortunik sumiginnaanerat Inatsisartut Ilaqutariinnermut Peqqissutsimullu Ataatsimiititaliaannit assut annilaarnartinneqarpoq.
Ilaqutariinnermut, Naligiissitaanermut Isumaginninnermullu Naalakkersuisup Martha Lund Olsenip ulloq 12. marts 2015-imi siunersiorneqarnerani Qaasuitsup Kommuniani Qeqqatalu Kommuniani isumaginninnikkut nakkutilliiartorsimanerit oqaluuserineqarput. Nakkutilliinerit taamaattut Kommuneqarfik Sermersuumi Kommune Kujallermilu aamma ingerlanneqassasut ataatsimiititaliamit kaammattuutigineqarpoq, nalinginnaasumimmi taama ingerlasoqarneranut tamanna takussutissat siullersariinnaraat aarleqqutigineqarmat maannangaaq qisuariartoqartariaqartoq ataatsimiititaliaq isumaqarpoq.
Pisuni aalajangersimasuni inatsisinik unioqqutitsisoqarsimasoq ataatsimiititaliamut paasissutissiissutigineqarpoq. Meeqqanik inuusuttunillu sakkortuumik sumiginnakkanik nalunaarutiginninnerit kommunit ajoraluartumik iliuuseqarfigisarsimanngilaat. Iliuuseqartannginnerit taamaattut kommunini allani atuussinnaanerat ataatsimiititaliamit assut ernummatigineqarpoq, taamaattumillu kommunini ajornartorsiutit Naalakkersuisut ataatsimiititaliarlu suleqatigalugit qulaajarneqarnissaat pisariaqarpoq.
Ilaqutariinnermut, Naligiissitaanermut Isumaginninnermullu Naalakkersuisoq naapertorlugu ataatsimiititaliap paasivaa pinerluttulerinermi inatsimmik unioqqutitsisoqarsimasinnaanerata nalilerneqarnissaa siunertaralugu politiit attavigineqarsimasut. Tassami meeqqanik inuusuttunillu ikiorsiisarneq pillugu Inatsisartut peqqussutaanni nr. 1, 15. april 2003-meersumi § 40 malillugu allassimammat;Kinaluunniit inatsisartut peqqussutaata matuma atortinneqarnerani peqataasoq pisortanik sullissitilluni suliffeqartilluniluunniit pinerluttulerinermi inatsimmi pinerluutit pillugit malittarisassat malillugit akisussaaffeqarpoq suliffik qinigaanikkut pigaluarpalluunniit.
Isumaginninnikkut suliassat amerlaqisut eqqarsaatigalugit kommunini sulianik ingerlatsisut sulinerminni imaannaanngilluinnartunik atugassaqartinneqartut ataatsimiititaliamit ilisimaneqarpoq, pissutsillu tamakku aaqqiivigineqaqqullugit Naalakkersuisut kommunillu qanimut ingerlaavartumillu oqaloqatigiittariaqarput. Akisussaaffik kommunit Namminersorlutillu Oqartussanit tiguneqartariaqarpoq. Ataatsimiititaliaq naliliivoq tamanna ingerlaannartumik aaqqiivigineqartariaqartoq, tassami meeqqanut pitsaanerusussat, innuttaasunut ajornartorsiuteqartunut pitsaanerusussat aammalu inuit pisinnaatitaaffiinik unioqqutitsinerit pineqarmata.
Meerartatta inuusuttortattalu toqqissimasumik avatangiiseqarlutik peroriartornissaasa pingaartinneqarnissaa qulakkeerneqarnissaalu inuiaqatigiittut suleqatigiissutigisariaqaripput ataatsimiititaliaq isumaqarpoq. Pitsaaliuiniarluni siusissukkut iliuuserineqartartut pitsaanerpaamik naammaginartumillu sunniuteqaleqqullugit taakku misissoqqissaarneqarnissaat assut pisariaqartoq ataatsimiititaliaq isumaqarpoq. Meeqqat inuusuttullu kinguaassiuutitigut atornerlugaanermikkut, nakuuserfigineqarnermikkut allatigulluunniit akuersornanngitsumik pineqarnermikkut ilungersuuteqarnerat iliuuseqarnata isiginnaaginnarsinnaanngilarput, kommuninimi nukissat naammanngillat, taamaattumillu meeqqat inuusuttullu iliuuseqarfigineqarnatik immineerneqartarlutik. Taamaaliornikkut pisortat sumiginnaapput, tamannalu Naalakkersuisut suleqatigalugit aaqqiiviginiarlugu ataatsimiititaliamit sapinngisarput tamaat iliuuseqarfigerusupparput.
Taamaattumik meeqqanut inuusuttunullu suliassaqarfimmut sulisutigut aningaasatigullu nukissanik pisariaqartunik atuisoqarnissaa siunertaralugu nassuerutiginninnissaq, suleqatigiinnissaq ammasuunissarlu ataatsimiititaliamit kaammattuutigineqarput. Aammalu akisussaaffik ataatsimiititaliap susassaqarfiata iluaniittoq tiguneqarpoq kiisalu naalakkersuinikkut nukiit siumut isigisumik aallunneqarnissaat aalajangiusimaneqarluni.
Kommunini isumaginninnermut ataatsimiititaliat siunissami oqaloqatigineqartarnissaat ataatsimiititaliamit kissaatigineqarpoq, taamaalilluni isumaginninnermut tunngasuni pingaartumillu meeqqanut inuusuttunullu tunngasutigut kommunit unammilligassaat pillugit paasissutissanik ataatsimiititaliaq toqqaannartumik aamma pissarsisarsinnaaqqullugu. Ataatsimut ajornartorsiut maannakkorpiaq iliuuseqarfigisariaqartoq pillugu kommunini Namminersorlutillu Oqartussani politikerit akornanni ataqatigiissitsilernissamut peqataaqataanissaq ataatsimiititaliap taamaaliornermigut neriuutigaa.
Ilaqutariinnermut, Naligiissitaanermut Isumaginninnermullu Naalakkersuisup ataani qitiusumik siunnersuisarfimmik pilersitsinissaq ataatsimiititaliamit taperserneqarpoq, isumaqarlunili nunatsinni meeqqat inuusuttullu pillugit suliassat akisussaaffiullu isumagineqarnissaat eqqarsaatigalugu immikkoortortaq taamaattoq naammannavianngitsoq. Iliuutsinik aalajangersimasunik aallartitsinerup saniatigut kommunini sulianik ingerlatsisunik piginnaanngorsaaneq ilinniartitsinerlu pillugit Ilaqutariinnermut, Naligiissitaanermut Isumaginninnermullu Naalakkersuisoq oqaloqatiginninnernik ingerlatsimmat ataatsimiititaliamit pitsaasutut isigineqarpoq. Ataatsimiititalialli Naalakkersuisunut erseqqissaatigissavaa iliuutsit pisariaqartitanut naapertuutissammata.
Ataatsimiititaliap naggasiutigalugu erseqqissassavaa meerartatta inuusuttortattalu tamatta kissaatigisatsitut toqqissisimasumik avatangiiseqarlutik peroriartornissaat innuttaasut tamarmik inuiaqatigiillu ataatsimut akisussaaffigimmassuk. Taamaattumillu sumiginnaanerit iliuuseqarfiginissaannut pisussaaffeqarnitta saniatigut ajornartorsiuteqarneq tamatta nassuerutigisinnaallugulu ammaffigisariaqarparput. Tassunga atatillugu pisortat aamma sumiginnaannginnissaat pingaaruteqarluinnarpoq.
Tillie Martinussen
Ilaqutariinnermut Peqqissutsimullu Ataatsimiititaliap siulittaasua
Annertunerusumik paasisaqarusukkaanni ataatsimiititaliap siulittaasuanut Tillie Martinussenimut, mobil +299 27 49 27 saaffiginnittoqarsinnaavoq.