2024 2023 2022 Flere år...
22-04-2015
Nunanut Allanut Sillimaniarnermullu Ataatsimiititaliap puisit Eqalunni erseqqissumik sammineqarnissaat kissaatigaa
Nunanut Allanut Sillimaniarnermullu Ataatsimiititaliap puisinit nioqqutissianik eqqusseqqusinnginnermik EU-p peqqussutaani Inuit ilaatinneqannginnerata sukaterneqarnissaanik siunnersuutip ukioq manna Eqalunni ulluni 24. aamma 25. april Issittumi Siunnersuisoqatigiinni ministerit ataatsimiinneranni Nunanut allanut Naalakkersuisumit eqqaaneqarnissaa taperserpaa.
Ataatsimiititaliaq ulloq 21. april 2015 Nunanut allanut Naalakkersuisumik siunersiuivoq, tamatumalu kingorna ilaatigut EU-p Issittumik annertuumik soqutiginninnerata taamatullu aamma puisinit nioqqutissianik eqqusseqqusinnginnermini Inuit ilaatinneqannginnerannik sukaterinissamik EU-p siunnersuuteqarnerata imminnut ataqatigiinnginnerat eqqartorlugu.
Naalagaaffeqatigiit EU Issittumi Siunnersuisoqatigiinni alaatsinaatsutut tikilluaqqoreerpaat, naatsorsuutigineqarlunilu EU-p alaatsinaatsutut inissisimanissaa Issittumi Siunnersuisoqatigiinni ministerit ukioq manna ataatsimiinneranni pissusissaminut inississasoq. Nunanut Allanut Sillimaniarnermullu Ataatsimiititaliap taamatuttaaq EU Issittumi Siunnersuisoqatigiinni alaatsinaatsutut tikilluaqqorusuppaa.
Peqatigitillugu ataatsimiititaliap EU kaammattorusuppaa Issittoq issittumilu inuit inuuniarnerminni atugarisaat pillugit EU-mi innuttaasut paasisimasaqarnerulernissaat timitalimmik suliniutigeqqullugu. Minnerunngitsumik EU kaammattorparput naggueqatigiit Inuit kulturitsinnik ineriartortitsinissamut pisuussutitsinnillu piujuartitsinermik tunngavilimmik iluaquteqarniarnissamut pisinnaatitaffitsinnik tamakkiisumik ataqqinneqqullugu. Illuatungeriilluta paaseqatigiilluta ataqqeqatigiillutalu naapissinnaasariaqarpugut - tamannami pitsaasumik suleqatigiinnissamut aallaaviummat.
Steen Lynge
Ataatsimiititaliaq sinnerlugu
Paasissutissat sukumiinerusut ataatsimiititaliap ataatsimiinneranut peqataasunut oqarasuaatikkut attaveqarluni pissarsiarineqarsinnaapput:
Steen Lynge, +299 23 98 23
Sara Olsvig, +299 52 68 58
Ineqi Kielsen, +299 58 73 31
Tillie Martinussen, +299 27 49 27