2024 2023 2022 Flere år...
22-05-2015
Nunat Avannarliit Killiit Siunnersuisoqatigiiffiat puisit pillugit suliamut pimoorussilluni peqataavoq
Nunat Avannarliit Killiit Siunnersuisoqatigiiffiat ulloq 11. maj Reykjavikimi Northern Dimension ataatsimiinneranut peqataavoq, Nunat Avannarliit Killiit Siunnersuisoqatigiiffiata siulittaasua savalimmiuneersoq Bill Justinussen taamatuttaaq ataatsimeersuarnermit inaarutaasumik nalunaarutissap isumaqatigiinniutigineqarneranut peqataalluni.
Northern Dimensionimut peqataasut EU, Island, Rusland aamma Canada isumaqatigiissutigaat ataatsimeersuarnerit oqaaseqaat ilaatigut ima oqaasertaqassasoq:
Inuiaqatigiit avannarpasissumiittut inatsisiliornerit atuuttut naapertorlugit qangaaniilli nioqqutissiaasa, assersuutigalugu puisinit nioqqutissiat, niuerfinni nioqqutigineqarsinnaanerisa qulakkeerneqarneratigut inuuniarnikkut tunngavissaqarnissaa qularnaarneqarnissaata pingaaruteqassusiata piujuartitsinermillu tunngavilimmik pisuussutimminik iluaquteqarniarsinnaatitaanerisa ataatsimut paasinineqarnissaa aqqutissiuuteqquneqarpoq.
Nunat Avannarliit Killiit Siunnersuisoqatigiiffiannut nunatsinnit aallartitat ataatsimiinnermi angusat iluarisimaarpaat.
Northern Dimension ataatsimeereernerata kingorna Nunat Avannarliit Killiit Siunnersuisoqatigiiffiat puisinut tunngasumi suliassami akuusut soqutigisallillu assigiinngitsut naapisinneqarnissaannik sulissuteqarpoq. Tassunga peqataasut ilagaat Inuit Sila, Great Greenland aamma Kopenhagen Fur. Peqataasut tamarmik pineqartumut tunngatillugu immikkut ilisimasaminnik saqqummiussipput, pitsaasumillu oqaloqatigiittoqarluni. Ataatsimeeqataasut puisinut tunngatillugu soqutigisallit tamarmik ataatsimiisinneqarnissaat kissaatigaat, taamaalillutik kikkut tamarmik suliami soqutigisalit isummaminnik annissisinnaaniassammata.
Marsip qaammataagali Nunat Avannarliit Killiit Siunnersuisoqatigiiffiata EU-p inatsisartuisa ataatsimiititaliaat DEEA ataatsimeeqatigaat, ataatsimiinnermilu tassani qaaqquneqarlutik EU-p inatsisartuinut ilaasortanut paasisitsiniaanissaq siunertaralugu, paasisitsiniaaniisarmi pingaaruteqarmat nunatsinni puisinniariaatsit puisinniariaatsinit allanit, soorlu ass. canadami ilaatigut avaartarlugit puiseerarniartarnermut, assigiinngissuteqarnerat erseqqissarniarlugu.
Taamaattumik aamma pingaaruteqarpoq suliami matumani nunatta ataatsimoornissaa, paasiissutissallu amernit nioqqutissianik piserusussinnaasunut anngunnissaat, paasiteqqullugu Inuit puisinniariaasiat puisinniariaatsinit allanit allaanerummat, puisinillu nioqqutissiat piujuaannartitsinermik tunngavilimmik piniarnermit aallaaveqarmata - Nunat Avannarliit Killiit Siunnersuisoqatigiiffianni nunatta aallartitaasa siulittaasuata tulliata Randi V. Evaldsen oqarpoq.
Sapaatyip akunnera una siulittaasup tullia marlunngormat pingasunngormallu Strasbourgimi EU-p inatsisartuisa illorsuata silataani paasititsiniaanermut peqataavoq Great Greenlandimeersumik kavasserluni. Paasisitsiniaanermi puisinniartarneq pillugu paasissutissanik ilaatigut agguaasoqarpoq.
Randi V. Evaldsenip Danmarkimit EU-p inatsisartunut ilaasortaq Bendt Bendtsen, Leif Fon-taine KNAPK-mit aamma Aaju Peter ataatsimeeqatigivai. Bendt Bendtsenip ataatsimeeqatigiinnermi nalunaarutigaa nunatta soqutisai sorsuutigigitik kingunerisinnaasaalu eqqumaffigalugit, EU-p inatsisartuinulli ilaasortat allat paasitinniarnerat imannaanngitsoq, taamatullu aamma ajuusaarnarluinnarmat EU-p inatsisartuinit ilaasortat eqqumaffiginngimmassuk suliaq inunnut inuiaqatigiinnullu eqqorneqartunut qanoq ajortigisumik sunni-uteqarsinnaasinnaanersoq.
EU-p peqqussimmini 1007/2009-mi allannguutit juunimi 2015-imi akuersissutigisussaavai, tamanna pisariaqalersimammat peqqussummut Inuit ilaatinneqannginnerannik aalajangersagaq WTO-mi malittarisassanut naapertuutinngitsoq WTO aalajangeereersorlu.
Erseqqissarneqartuartariaqarpoq suliassaq manna nunatsinnut tamarmut tunngammat inui-aqatigiinnilu kikkunnilluunniit attuilluni, taamaattumillu Nunat Avannarliit Killiit Siunnersuisoqatigiiffiata periarfissani tamaasa atorsimallugit Northern Dimensionip ataatsimiinnerani EU-llu inatsisartuinut ataatsimeeqateqarnermi oqariartuutigalugu suleqatigiinneq ataqatigiissaarinerlu sooq taama pingaaruteqartiginersut. Taamaattumik aamma pingaaruteqarpoq oqaatsinik assigiinngitsunik atuisinnaanissaq, taamaaliornikkut susassaqartut nalinginnaasumik anguneqarneq ajoraluartut anguneqarsinnaammata - Randi V. Evaldsen naggasiivoq.
Randi V. Evaldsen
Nunat Avannarliit Killiit Siunnersuisoqatigiiffianni Kalaallit
Nunaannit aallartitat
siulittaasuata tulliata
Paasissutissat sukumiinerusut aallartitat siulittaasuata tullia
+299 54 72 12 attaveqarfigalugu pissarsiarineqarsinnaapput.