2024 2023 2022 Flere år...
23-05-2015
Siunersiuineq: Avaleraasartoorniarneq pillugu nukinginnartumik siunersiuinissamut Naalakkersuisut Siulittaasuat aamma Aalisarnermut, Piniarnermut Nunalerinermullu Naalakkersuisoq Aalisarnermut Ataatsimiititaliamit aggersarneqarput
Naalakkersuisut Siulittaasuat Kim Kielsen aamma Aalisarnermut, Piniarnermut Nunalerinermullu Naalakkersuisoq Karl-Kristian Kruse avaleraasartoorniarneq pillugu nukinginnartumik siunersiuinissamut aggersarneqassasut Aalisarnermut, Piniarnermut Nunalerinermullu Ataatsimiititaliap tallimanngornermi aalajangerpaa.
Qinnuteqarnerup ingerlarnga, tassunga ilanngullugit qinnuteqarnissamut killissarititap sivitsorneqarneranut tunngavigineqartoq - aammalu qinnuteqaatit suliarineqarnerannut atatillugu aalajangiinermut tunngavigineqartut ilaatigut nassuiaateqarfigineqarnissaat ataatsimiititaliamit kissaatigineqarpoq.
Ataatsimiititaliap siulittaasua oqarpoq: "Ingerlasimaneq Naalakkersuisoqarfimmi imminut misissornissamut tunngavissiisariaqartoq ataatsimiititaliaq isumaqarpoq. Aqutsinermi aalajangiinerup taama annertutigisumik oqallisigineqarnera qaqutigoortorujussuuvoq".
Avaleraasartoortassanik agguataarinerup tamanut saqqummiunneqarnerata kingorna ataatsimiititaliaq aalisartunit arlalippassuarnit qinnuteqaamminnik itigartinneqarsimasunit saaffigineqarpoq.
Avaleraasartoorniarnerup nunatsinni inuiaqatigiinni suliffissanik pilersitsinissamut inerikkiartortitsinissamullu pingaarnertut atorneqarnissaa pingaaruteqarpoq, ataatsimiititaliamilu amerlanerussuteqartut isumaqarput ilaatigut sukumiisumik suliarinnittoqarsimanngitsoq.
Nikolaj Jeremiassen
Aalisarnermut, Piniarnermut Nunalerinermullu Ataatsimiititaliaq
Annertunerusumik paasissutissat ataatsimiititaliap siulittaasuanut Nikolaj Jeremiassenimut, mobil +299 53 32 63, saaffiginninnikkut pissarsiarineqarsinnaapput.