Nutaarsiassat

11-06-2015

Avaleraasartoortassat agguataarneqarnerat pillugu tunngaviusumik apeqqutigineqartunut akissutit Aalisarnermut Ataatsimiititaliami amerlanerussuteqartunit amigaatigineqarput

Ukioq manna avaleraasartoortassanik agguataarinermi periuseq, tamanut saqqummiunneqarnermini inuiaqatigiinni misigissutsitigut annertuumik aalassatsitsisoq, Aalisarnermut Ataatsimiititaliamit suli misissorneqarpoq.  

Taamaakkaluartoq apeqqutinik arlalinnik akissuteqarfigineqanngitsunik Aalisarnermut Ataatsimiititaliami amerlanerussuteqartut peqarput. Taamaalilluni Naalakkersuisut Siulittaasuannik arlaleriarluni siunersiuisoqaraluartoq, tamatumalu saniatigut allakkatigut arlalippassuarnik apeqquteqartoqaraluartoq apeqqut tunngaviusoq suli akineqarsinnaasimanngilaq: Kikkut sumik pippat, sooq?

Apeqqutit agguataarinermi periutsimut atatillugu ataatsimiititaliamit kisimi pinnani inuiaqatigiinnilli tamanit apeqqutigineqartut akissuteqarfiginissaannut Naalakkersuisut annertunerusumik iliuuseqarsinnaasut -iliuuseqarsinnaasariaqartullu - ataatsimiititaliami amerlanerussuteqartut isumaqarput. Apeqqutit maannamut pissarsiarineqartut tamakkiisuunngitsut Aalisarnermut Ataatsimiititaliami amerlanerussuteqartut isumaqarput.

Suliap kinguarsarnissaa kikkunnulluunniit ajoqutaaginnassaaq. Taamaattumik suna tamaat saqqummiuteqqullugu - aammalu paasissutissat attuumassuteqartut tamaasa ataatsikkut saqqummiuteqqullugit Naalakkersuisut Aalisarnermut Ataatsimiititaliami amerlanerussuteqartunit kaammattorneqarput, taamaalilluni suliaq peqqissaartumik sapinngisamik piaartumik paasinarsisinneqarsinnaaqqullugu.

Nikolaj Jeremiassen

Aalisarnermut, Piniarnermut Nunalerinermullu Ataatsimiititaliaq

Mobil: +299 53 32 63