Nutaarsiassat

26-07-2015

Talvivaarami aatsitassanik piaavimmit finlandimiut misilittagaannik Aatsitassanut Ataatsimiititaliaq paasisassarsiortoq.

Inatsisartut Aatsitassanut Ataatsimiititaliaat sapaatip akunnerani 30-mi Finlandimut paasisassarsiorluni angalavoq, ilaatigut Talvivaarami aatsitassanik piiaavimmut, ilaatigut imermik akuutissanik assigiinngitsunik akulimmik aniasoortoqarnerata kingorna, 2012-imi novembarimi matusariaqarsimasumut atatillugu misilittakkanik kingunerisimasaanillu tusarusulluni.

Ingerlatseqatigiiffik Talvivaaramik ingerlatsisoq maanna akiliisinnaajunnaarsimavoq, aatsitassanilli qallorneqarsimasunik tunisassiorneq annikillisamik saliinerup ingerlanerani pisortanit ingerlanneqaannarluni. Aatsitassanik qalluivimmi annerusumik nikkel, kanngussak zinkilu tunisassiarineqarput, qallorneqartorlu uranitaqalaarmat aamma taanna tunisassiarineqarsinnaasutut eqqarsaatigineqarluni.

Aatsitassanut Ataatsimiititaliap Talvivaarami sulianut atatillugu Finlandimi oqartussat assigiinngitsut, avatangiisinik illersuiniaqatigiiffit attuumassutillit, sumiiffimmi nakkutilliinermut oqartussat aatsitassarsiorfimmilu sulisut oqaloqatigaat. Angalanermut atatillugu immikkoortut uku erseqqissarneqarnissaat ataatsimiititaliap kissaatigaa:

Finlandimi misilittakkat erseqqilluinnartumik takutippaat piiaanissamik akuersissuteqartoqannginnera pissutsit tamaasa qulaajaqqaarnagit suliniutinut akuersissuteqarneq akisoorujussuusinnaasoq. Tamatuma saniatigut qularutissaanngilaq aatsitassanik qalluisoqassatillugu periaatsit atorneqartut killiliussallu ingerlaavartumik nalilersorneqartarnissaat - nalilersoqqinneqartarnissaallu - pisariaqartoq. Taamaattumik ataatsimiititaliamut aatsitassanik piiaavimmut taamaattumut qanimut alakkaaneq isummarsiorfiulluarlunilu ilinniarfiulluarpoq. Ataatsimiititaliaq angerlassaaq ilisimasarnerulersimalluni, taamatullu aamma taamatut aniasoortaqarnerata malitsigisinnaasai takusinnaalersimallugit.

Aniasoornerup toqqaannartumik kinguneranik Finlandimi oqartussat nassuerutigaat susassaqartut tamarmik akornanni pitsaanerusumik oqaloqatigiittarnissaq pisariaqartoq, tamannalu tunngavigalugi piujuartitsinermik tunngavilimmik aatsitassarsiorneq pillugu attaveqaqatigiittarfimmik pilersitsisoqarluni, maanna ataavartussanngortinneqarsimasumik. Aniasoornerup kingorna attaveqaqatigiittarfiup aatsitassarsiorneq eqqarsaatigalugu inatsisiliornerit tamaasa iluarsisariaqarnersut misissuataarsimavai pingaartissimallugulu aatsitassarsiornermik ingerlatallit, avatangiisinik illersuiniaqatigiiffiit takornariartitsisarnermillu ingerlatallit akornanni oqaloqatigiinnerulernissap pilersinneqarnissaa. Attaveqaqatigiittarfiup pineqartup pilersinneqarnerata kingorna pingaaruteqarpoq aamma oqaatigissallugu naak tamatigut isumaqatigiittoqartanngikkaluartoq oqaloqatigiittarnerit ingerlaannarnissaat annertusarneqarnissaallu kissaatigineqarmat.

Angalaneq iluatsillugu ataatsimiititaliap taamatuttaaq Danmarkimi DCE Risølu naapippai. Ataatsimiinnerni taakkunani annerusumik sammineqarput atortussiassat radiup qinngualanerinik aniatitsisartut, taakku sumut atorneqartarneri avatangiisinullu sunniutigisinnaasaat. Nunatsinni aatsitassarsiornermut uuliasornermullu atatillugu najoqqutassiat nutaat oqallisiginissaannut aamma periarfissaqarsimavoq.

Ataatsimiititaliap qujassutigaa Finlandimi oqartussat danskillu aallartitaqarfiat ikiuulluarsimammata angalaneq sukumiisumik tamatigoortumillu pissarsivioqqullugu - aamma naak piffissaq angalaviusoq alakkakkani sulinngiffeqarfiugaluartoq. Aatsitassanut Ataatsimiititaliap angalanini naggaserlugu ataasinngornermi Nordsøfonden ataatsimeeqatigiissavaa.

Paasissutissat sukumiinerusut ukununnga saaffiginnilluni pissarsiarineqarsinnaapput:
Siulittaasup tullia Randi V. Evaldsen +299 54 7212
Ilaasortaq Naaja H. Nathanielsen +299 54 8981

Peqataasut allat tassaapput: Kalistat Lund, Ineqi Kielsen, Siverth K. Heilmann kiisalu Juliane Henningsen