2024 2023 2022 Flere år...
10-09-2015
Ilaasunik angallassisarnermik kiffartuussinissamut isumaqatigiissutinik suliaqarnini Inatsisartut Aningaasaqarnermut Akileraartarnermullu Ataatsimiititaliaata naammassivaa
Kalaallit Nunaanni nunami namminermi ilaasunik, allakkanik nassiussanillu angallassisarneq pillugu kiffartuussinissamut isumaqatigiissutit atuuttut attatiinnarneqarnissaat pillugu Naalakkersuisunit qinnuteqaat Aningaasaqarnermut Akileraartarnermullu Ataatsimiititaliamit isumaqatigiittumit akuersissutigineqarpoq. Kiffartuussinissamut isumaqatigiissutit ukiumi ataatsimi atuuttussamik sivitsorneqarput.
Illuatungeriinnut tamanut attanneqarsinnaasumik angusaqarnissaq siunertaralugu sulianik ingerlatsisut Naalakkersuisunut isumaqatigiinniuteqarnissamut pisariaqartitaq naapertorlugu piffissalerneqarnissaminnut isumannaarissunneqassasut ataatsimiititaliaq isumaqarpoq.
Taava maanna 2017-imiit siumut atuuttussanik kiffartuussinissamut isumaqatigiissutinik nutaanik angusaqarnissamut isumaqatigiinniarnerit pisariaqartut ingerlanneqarnissaannut piareersaateqarnissaq Naalakkersuisunit suliassaalerpoq. Ataatsimiititaliap isumaa tunngavigalugu Naalakkersuisut suliamik aallartitsinissaminnut aappaagumut utaqqisariaqanngillat. Suliap ingerlallualernissaa, kiisalu innuttaasut ingerlatsisullu eqqarsaatigalugit siumut piffissamut sivisunerusumut isigisumik aappaagu iluarsiisoqarnissaa, isumannaarniarlugit qaammatip uuma ingerlanerani kingusinnerusukkut suliaq pillugu Naalakkersuisunik oqaloqateqarnissani ataatsimiititaliap siunertaraa. Innuttaasut ingerlatsisullu piffissaalluartillugu angalanissamut pilersaarusiorsinnaannginnertik pillugu pakatseqqittut ataatsimiititaliap maluginngitsoorsimanngilaa. Pissutsit taamaattut pinngitsoortinneqarnissaat ataatsimiititaliamit pingaartinneqarpoq.
Paasissutissanik allanik pissarsiniarluni Aningaasaqarnermut Akileraartarnermullu Ataatsimiititaliap Siulittaasuanut Jens Emanuelsenimut oqarasuaammut:+299 52 21 10-mutsaaffiginnittoqarsinnaavoq.