2024 2023 2022 Flere år...
15-09-2015
Nunani avannarlerni illersornissaq pillugu naalakkersuinikkut pissutsit aammalu Nunat Avannarliit Siunnersuisoqatigiiffiata ataatsimiittarneri pillugit issiaqatigiilluni oqaloqatigiinneq Inatsisartunut ilaasortanit Ineqi Kielsenimit aamma Iddimanngiiu Biancomit peqataaffigineqartoq
Nunani avannarlerni illersornissaq pillugu naalakkersuinikkut pissutsit pillugit ulloq 7. september 2015 issiaqatigiilluni oqaloqatigiinnermut qaaqqusisoqarnerani Kalaallit Nunaannit Nunat Avannarliit Siunnersuisoqatigiiffiannut aallartitat peqataanerminni Ineqi Kielsenimit siulersorneqarput.
Svenskit illersornissamut ministeriat Peter Hultquist nunani avannarlerni illersornissakkut suleqatigiinneq Nordefco pillugu, nunanit avannarlernit namminersorlutillu oqartussaaffeqarfinnit Inatsisartunut qinikkatut Nunat Avannarliit Siunnersuisoqatigiiffianni aallartitanut saqqummiussilluni oqaloqatigiinnernik ammaavoq. Pingaartumik Ruslandip nunanut avannarlernut qanittumi issittumilu nunanut allanut naalakkersuinikkut pissusilersornera oqallisigineqarpoq.
Russit sakkutooqarnikkut nunanullu allanut sammisumik naalakkersuinikkut avammut iliuuserisaat kingulliit ataatsimut isigalugit isumakulunnartinneqarput, illua' tungaatigulli nunanik baltikumimiittunik oqaloqateqarneq taakkuninngalu ersoqateqarneq ingerlatiinnarnissaa tunngavigalugit nunat avannarliit aalajaatsuunerisa toqqissisimanartuunerisalu attatiinnarnissaat siunertaralugu nunat avannarliit pingaartitaannik attassiinnartoqassasoq avannaani nunat ataasiakkaat ataqqillugit isumaqatigiissutigineqarpoq. Issittumi pissutsit aamma siunissami eqqumaffigineqassasut oqaloqatigiinnerni oqaatigineqarpoq. Sverigep Finlandillu NATO-mut ilaasortanngorsinnaanerat pillugu isummersuutit saqqummiunneqarput, tamanna naak ilaasortanngornissaq maannangaaq tunngavissaqarpallaanngitsutut isikkoqaraluartoq.
Issiaqatigiilluni oqaloqatigiinnerit sammisamut attuumassuteqarluartumik, ammasumik imminullu ataqqeqatigiiffiusumik ingerlanneqarput, illersornissakkut apeqqutit pillugit oqaloqatigiinnermut Kalaallit Nunaata Nunat Avannarliit Siunnersuisoqatigiiffiannut ilaasortatut nunat avannarlermiut tamaasa naligalugit siullermeerluni peqataanerata pingaaruteqarnera Ineqi Kielsenimit erseqqissaatigineqarpoq. Oqaloqatigiinnerni Ministerit Inatsisartullu saniatigut illersornissamut nunanullu allanut naalakkersuinikkut pissutsinik immikkut ilisimasalinnik peqataasoqarpoq, tassani aamma illersornissakkut pisortat peqataallutik.
Nunat Avannarliit Siunnersuisoqatigiiffiata Oslomi ulluni 8. aamma 9. september ataatsimiinnerani Ineqi Kielsen aamma Iddimanngiiu Bianco peqataapput. Partiit ataatsimiinneri ataatsimiititaliat ataatsimiinneri ataatsimoorlunilu ataatsimiinnerit norskit Inatsisartuisa Stortingip ataatsimiittarfiini ingerlanneqarput.
Siunnersuutit ataatsimiinnerni oqaluuserisat ataatsimut isigalugit tassaapput Nunat Avannarliit Siunnersuisoqatigiiffiata Reykjavikimi katersuunnissaani ulluni 27. - 29 oktober 2015 pisussami naammassillugit suliarineqartussat. Katersuunnerup kingorna Nunat Avannarliit Siunnersuisoqatigiiffianni ukioq nutaaq aallartinneqassaaq. Nunat Avannarliit Siunnersuisoqatigiiffianni iluarsartuusseqqinneq maanna ingerlanneqartoq 2016-imi annertuumik sammineqassaaq, tassami Nunat Avannarliit Siunnersuisoqatigiiffianni ilaatigut suleriaatsinik ataatsimiititaliallu katitigaanerannik allanngortitsinissaq siunertarineqarmat.
Paasissutissanik amerlanerusunik pissarsiniarluni Ineqi Kielsen oqarasuaammut 58 73 31-mut saaffigineqarsinnaavoq.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgimit, Danmarkimit, Sverigimit, Finlandimit, Islandimit nunanillu namminersorfiusunit Savalimmiunit, Kalaallit Nunaannit Ålandimillu inatsisartunut ilaasortanik 87-inik ilaasortalik.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnillu sinniisussaqarlutik. Ineqi Kielsen Siumumeersoq aamma Iddimanngiiu Bianco Inuit Ataqatigiinneersoq Nunat Avannarliit Siunnersuisoqatigiiffianni ilaasortaapput. Iddimanngiiu Bianco Kultureqarnermut Ilinniartitaanermullu Ataatsimiititaliami ilaasortaavoq Ineqi Kielsenilu Avatangiisini Pinngortitamilu Pisuussutinut Ataatsimiititaliami ilaasortaalluni.