2024 2023 2022 Flere år...
24-09-2015
Inatsisartut maanna namminerisaminnik iPadimut app'eqalerput
Inatsisartut 2015-imi ukiaanerani katersuunnerup aallartinnissaanut namminerisaminnik iPadimut app'imik ineriartortitsipput.
App'i Inatsisartut nittartagaata ina.gl-ip imarisaasa ilaannik imaqarpoq, sulinermut tunngatillugu paasissutissanik attuumassutilinnik iPadikkut aallernissamut app'ip atortuunissaa isumaliutaavoq. Taamaammallu Inatsisartunut ilaasortat Inatsisartullu Allattoqarfianni sulisut, nutaarsiassat, katersuunnermi atortussat kiisalu saqqummersitat allagaatillu pillugit nalunaarsuiffiit pingaarnertut tassani imarineqarput. Inatsisartut pillugit paasissutissat allat tamarmik suli ina.gl-imi nassaarineqarsinnaapput.
Inatsisartunut ilaasortat, partiinut allatsit, Namminersorlutik Oqartussani atorfillit allallu Inatsisartuni pisunik malinnaarusuttut tamarmik app'imik atuinissaat neriuutigaara. Taanna ingammik katersuunnerup nalaani sulinermi atortussaavoq pitsaasoq, tassami allagaatinik nutartikkanik nutaanerpaanik aallernissamut aqqutissaavoq sukkasooq piuminartorlu.
Inatsisartut app'iat iPadikkut atorneqarsinnaavoq "Apple AppStore"-milu "Inatsisartut" ujarneqarpata aaneqarsinnaalluni. App'ip siullermeerlugu qarasaasiamut ikkunneqarnera sivisusinnaavoq, tassami ikkussinerminut ilanngullugu imarisani pdf-itut allaganngorlugit aassagamigit. Tamatuma kingorna app'i ingerlanermini nalunaaquttap akunnera affakkaarlugu pissusissamisoortumik naleqqussartarpoq (synkronisering). Tamatuma kingorna app'i attaveqaaserani atorneqarsinnaalissaaq (offline).
Lars-Emil Johansen
Inatsisartut Siulittaasuat
Paasissutissanik allanik pissarserusulluni tusagassiisarnermut suliniutinullu suleqataasoq Nils Baum oqarasuaatikkut uunga saaffigineqarsinnaavoq:+299 59 12 95.