2024 2023 2022 Flere år...
16-10-2015
Ilaqutariinnermut Peqqissutsimullu Ataatsimiititaliap hashimut akuersaanngilluinnarneq tapersersorpaa
Imarsiornermik Ilinniarfiup ilinniartut hashimik pujortartartut ajornartorsiutigineqarnerat toqqaannartumik aalajangersimasumillu iliuuseqarfigimmagu aammalu hashimik akuersaanngilluinnarnini nalunaarutigimmagu ataatsimiititaliamit nuannaarutigineqarpoq. Iliuuserineqartoq ataatsimiititaliamit tamakkiisumik taperserneqarpoq.
Hashi atuisut peqqissusiannut akornutaavoq, tamatumalu saniatigut hashi inuttut, inooqataanikkut aningaasaqarnikkullu imaannaanngitsunik kinguneqartarluni.
Nunatsinni hashimik tuniniaaneq, pisineq, eqqussuineq annissuinerlu, tunniussineq, tigusineq, sananeq, pigisaqarneq suliareqqiinerlu pinerluttuliornerupput.
Hashimik ajornartorsiutit pillugit siunnersuutinik arlalinnik UKA 2015-imi Inatsisartut suliaqassapput. Ataatsimiititaliamit tamanna qilanaarineqarpoq, tassami nunatsinni haship atugaanera peqqissutsikkut, inooqataanikkut, inuttut aningaasaqarnikkullu annertuumik akuerineqarsinnaanngitsunillu ajornartorsiortitsimmat, tamatumalu saniatigut hashimik tuniniaaneq, pisineq, eqqussuineq annissuinerlu, tunniussineq, tigusineq, sananeq, tigummiaqarneq suliareqqiinerlu annertuumik pinerluuteqarneruvoq.
Susassaqartut tamarmik ajornartorsiut pillugu suleqatigiissammata ataatsimiititaliap ilisimavaa, Imarsiornermilli Ilinniarfimmi aqutsisut ajornartorsiut ersarissumik aalajangersimasumillu iliuuseqarfigimmassuk ataatsimiititaliamit ataqqineqarpoq.
Ilinniarfiit, suliffeqarfiit, peqatigiiffiit, kattuffiit oqartussaasullu allat ajornartorsiutip iliuuseqarfiginissaanut hashimullu akuersaanngilluinnarnermik aalajangiusimanninnissamut ataatsimiititaliamit kaammattorneqarput.
Annertunerusumik paasisaqarusukkaanni ataatsimiititaliamut ilaasortat saaffigineqarsinnaapput.
Inatsisartunut ilaasortaq Tillie Martinussen, Demokraatit, siulittaasoq. Mobil 27 49 27
Inatsisartunut ilaasortaq Juliane Henningsen, Inuit Ataqatigiit, siulittaasup tullia. Mobil 48 81 48
Inatsisartunut ilaasortaq Jess Svane, Siumut. Mobil 58 82 15
Inatsisartunut ilaasortaq Laura Táunâjik, Siumut. Mobil 56 26 49
Inatsisartunut ilaasortaq Ineqi Kielsen, Siumut. Mobil 58 73 31
Inatsisartunut ilaasortaq Ane Hansen, Inuit Ataqatigiit. Mobil 58 76 61
Inatsisartunut ilaasortaq Mimi Karlsen, Inuit Ataqatigiit. Mobil 58 76 19