2024 2023 2022 Flere år...
08-11-2015
Tikkuartuineq pinnagu angusaqarniarluni suliaqarneq
Eqqortuuva pissuserissaarnerullunilu Naalakkersuisunut ilaasortap nunatsinni oqaluttarfiit pingaarnersaanniit atuarfimmi aalajangersimasumi pissutsit akuerineqarsinnaanngitsutut oqaatigissagunigit, peqatigisaanillu atuarfimmut pineqartumut nakkutilliisussaatitaanerminut suliassani naammassiumanagit? Apeqqut taanna Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap piffissami qanittumi siunersioqatigiinnermi Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisumut apeqqutigissamaarpaa.
Ulloq 14. oktober 2015 Inatsisartut apeqqarissaarneranni Narsami meeqqat atuarfiani soraarummeertussanit ataaserluunniit angusisimanngitsoq Nivi Olsen-ip oqaatigaa. Kingusinnerusukkut meeqqat atuarfiani atuartut angusinngitsoorneq ajortut Naalakkersuisoq Nivi Olsen-ip eqqortumik oqaatigalugu naqqiutigisaa ataatsimiititaliamit ilisimaneqarpoq. Minnerunngitsumilli oqaatigineqassaaq atuartut soraarummeertussat akornanni angusaasut pitsaannginneri pissutaallutik atuarfimmi pissutsit akuerineqarsinnaanngitsut.
Narsap atuarfia pillugu § 37 naapertorlugu apeqqummut akissut tunngavigalugu Narsap atuarfiani pissusissamisoortumik ingerlasoqartinnagu Naalakkersuisup akuliunnissani suliassamisut isiginngilaa. Aamma kommuni atuarfimmut suliniutinik ilorraap tungaanut aallartitsisussanik aallartitsisimatinnagu. Apeqqullu unaalerpoq; meeqqat atuarfiinut tunngatillugu kommuninut Naalakkersuisut nakkutilliisussaatitaanerat sunik nassataqarpa? Inatsimmi nassuiarneqarsimanera ersarippoq, taamaattorli nunatta atuarfiini pissutsit qanoq ittut Naalakkersuisut akuerisinnaassavaat akueralugillu? Qaqugu Naalakkersuisut naammagiliissappat?
Nunatsinni oqaluttarfiit pingaarnersaanniit Ilinniartitaanermut Naalakkersuisup atuarfimmut aalajangersimasumut tikkuaanera namminerlu akuliukkusunnani ataatsimiititaliamit ajuusaarnartutut isigineqarpoq. Taamaattumillu Ilinniartitaanermut Naalakkersuisoq Nivi Olsen siunersiuilluni ataatsimiinnissamut ataatsimiititaliamit aggersarneqarnissaa eqqarsaatigineqarpoq. Siullertut Naalakkersuisup ataatsimut isigalugu nakkutilliisussaatitaanermut tunngasut, tak. Nivi Olsen-ip nammineq politikikkut anguniagai. Aappassaattut Nivi Olsen-ip nammineq nassuiaaneratut meeqqat atuarfii akuerineqarsinnaanngitsunik atugassaqartitaallutik ingerlasut pillugit Naalakkersuisup suliniutai pillugit.
Tikkuartuineq ataatsimiititaliap isumaa malillugu aqqutissaanngilaq paarlattuanik akisussaallutik inissisimasut tamarmik, angajoqqaat, ilinniartitsisut, sumiiffimmi inuttaasut, atuarfinni siulersuisut, kommunit, Inatsisartut Naalakkersuisullu nunatsinni meeqqat atuarfiinut suna naatsorsuutiginerlugu oqaatigissussavaat, kinguneranillu nunatsinni meeqqat atuarfiini suliniutissanik ataatsimoorussanik pilersitsillutik, taamaaliornikkut meeqqat atuarfiat akuerineqarsinnaasuinnaanngitsoq pitsaanerpaarli anguneqarsinnaammat.
Vivian Motzfeldt
Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliamut siulitaasoq
Paasissutissanik annertunerusumik pissarsiniartoqartillugu ataatsimiititaliamut siulittaasoq Vivian Motzfeldt mobil +299 55 56 41 atorlugu attavigineqarsinnaavoq.