2024 2023 2022 Flere år...
20-11-2015
Inuussutissarsiutigalugu aalisarnermut akuersissutit/piniarnermut allagartat tunniunneqartarneranni suleriaatsimut Naalakkersuisut tatiginnilersitseqqittariaqarput
Aalisarnermut akuersissutit piniarnermullu allagartat tunniunneqartarnerat pillugu piffissami kingullermi oqallinnermut atatillugu Aalisarnermut, Piniarnermut Nunalerinermullu Ataatsimiititaliamit oqaatigineqassaaq:
Oqallinneq ataatsimiititaliat assut soqutigineqarluni malinnaaffigineqarpoq, tassunga ilanngullugu aalisartut piniartullu ataatsimiititaliamut ilaasortanut toqqaannartumik saaffiginnittut ernummassuteqarluni tusarnaarsimallugit.
Inuussutissarsiutigalugu aalisarnermut akuersissutinik/piniarnermut allagartanik tunniussisarnermi suleriaaseq saaffiginnittunit amerlasuunit apeqquserneqartartoq aammalu qinnuteqartut amerlasuut qinnuteqaatimik itigartinneqarneranut tunngavigineqartoq paasisinnaanagu oqaatigigaat ataatsimiititaliamit maluginiarneqarpoq.
Ataatsimiititaliap ajornartorsiut ull. 19. november 2015-imi ataatsimiinnermini oqaluuseraa, tamannalu attanneqarsinnaanngitsutut ataatsimiititaliamit isigineqarpoq - tamatumani aqutsineq inuillu inuussutissarsiutigalugu aalisarnermut akuersissummik piniarnermullu allagartamik qinnuteqarnissamik pilersaaruteqartut eqqarsaatigalugit.
Ajornartorsiutip iluarsiiviginissaanut sapinngisamik piaartumik iliuuseqaqqullugit, tassunga ilanngullugu qinnuteqartut ukiutik pissutigalugit itigartinneqartarsimasut pillugit oqalunneq ilumoornersoq misissoqqullugu Naalakkersuisut ataatsimiititaliamit kaammattorneqarput.
Tassunga atatillugu ataatsimiititaliamit oqaatigineqassaaq Naalakkersuisunut ilaasortat ataasiakkaat inuussutissarsiutigalugu aalisarnermut akuersissutitik/piniarnermut allagartatik paariinnaraat qinnuteqartut itigartinneqartarnerat naapertuutinngitsoq ataatsimiititaliaq isumaqarmat. Tamatumunnga ilanngullugu ataatsimiititaliamit eqqaasitsissutigineqassaaq qinnuteqartut amerlasuut piniarnerup aalisarnerullu saniatigut allanik periarfissaqartanngimmata, taamaattumillu imminut ilaquttanillu pilersuinissamut periarfissaannik arsaarneqartariaqarnatik.
Nikolaj Jeremiassen
Aalisarnermut, Piniarnermut Nunalerinermullu Ataatsimiititaliami siulittaasoq
Annertunerusumik paasisaqarniaraanni saaffigineqarsinnaavoq ataatsimiititaliap siulittaasua Nikolaj Jeremiassen, mobil +299 53 32 63.