Nutaarsiassat

30-11-2015

Meeqqat atuarfiat tamatta atuarfigaarput

Kingunilimmik suleqatigiinneq, piumassuseq piginnittuunerlu. Ataasinngorneq 23. november 2015 ingerlanneqartumi meeqqat atuarfiat pillugu isumasioqatigiinnermi naammasseqqammersumi oqaatsit taakku atorneqartuarput.

Ilinniartitaanermut Naalakkersuisoq, Inatsisartut Ilinniartitaanermut Ataatsimiititaliaat, KANUKOKA aamma IMAK peqataapput upernaarlu naammassineqartumut meeqqat atuarfiat pillugu naliliinermut isummatik tamarmik immikkut saqqummiussorlugit.  

Sooruna meeqqat atuarfiat ullumikkutut ittunik ajornartorsiuteqartoq? Qanoq ingerlaqqissinnaavugut? Meeqqatta ilinniakkamik aallartitsinissaannut piffissaq qaninnerusoq ungasinnerusorlu isigalugit qanoq iliorsinnaavugut? Meeqqat atuarfiannik qanoq ililluta tanngassimaarutiginninneq piginnuttussatullu isiginninneq qanoq ililluta annertusisarsinnaavarput? Aammalu sukkut naaperiarfissaqassaagut? Apeqqutit taakku isumasioqatigiinnermi qitiupput. 

Naak oqaluuserisaq politikikkullu tunuliaquttat assigiinngikkaluartut ulloq nuannersumik ingerlanneqarpoq. Meerartavut atuarnerminnik annertunerusumik pissarsiaqarsinnaanerat anguniarlugu suliffeqarfiit akimorlugit suleqatigiittoqartariaqartoq, soqutiginninneq annertunerusariaqartoq atorluarnerusariaqartorlu tamanik isumaqatigiissutigineqarpoq.    

Meeqqat atuarfiannik kikkut tamarmik piginnittutut misigisimalernissaat sulissutigisariaqarparput aamma meeqqat atuarfiat tanngassimaarutigisariaqarparput. Tamanna meeqqanut, ilinniartitsisunut, angajoqqaanut inuiaqatigiillu sinneranut atuuppoq. Meeqqat atuarfiat Kalaallit Nunaata tamarmi pigisaraa taamaattumillu akisussaaffivut suliffigullu  suugaluarpataluunniit ataatsimut akisussaaffigaarput il.il.   

Siunnersuutit, kissaatigisat pisariaqartitallu tigussaasut pingaarnerutillugit kinguneqartitsiniarluni isumasioqatigiinneq ingerlanneqarpoq. Namminerisamik kissaatigisat kisimik saqqummiunneqanngillat aammalu suleqatit kissaataat pisariaqartitaallu paasiniarneqarlutik tusarnaarneqarput. Taamaattumillu isumasioqatigiinnermi peqataasut tamarmik taamatut naapeqatigeeqqinnissamik siunertaqarput isumasioqatigiittarnerup ingerlatiinnarneqarnissaa siunertaralugu.