Nutaarsiassat

23-12-2015

Ilaqutariinnermut Peqqissutsimullu Ataatsimiititaliami ilaasortat paasisassarsiorlutik angalanerminni qanittukkut ingerlanneqartumi nutaanik, suliamut attuumassuteqartunik aamma ullumikkut ilisimalikkanik isumassarsiorfiusinnaasunillu pissarsiaqarlutik

Ulluni 8.-10. december 2015-imi Ilaqutarinnermut Peqqissutsimullu Ataatsimiititaliap ilaasortai danskit illoqarfiisa pingaarnersaannut paasisassarsiorlutik angalapput.

Napparsimasut kræftimik qaratsamikkullu aanaartoornermikkut timip ilaanik nukillaartoornernik nappaatillit sungiusaqqinneqartarnerannut tunngatillugu aalajangiiffigisassatut siunnersuutip UKA 2015-imi aamma UPA 2016-imi ataatsimiititaliamit suliarineqarneranut atatillugu angalaneq immikkut isigineqassaaq.

Nunatsinni sungiusaqqittarnermi pissutsinut inatsiseqanngilagut, taamaattumillu Naalakkersuisut Inatsisartullu tamatuma qulakkeernissaa siunissamut isigisumik suliassaqarput, taamaalilluni peqqinnissaqarfimmi katsorsarneqarnerup kingorna napparsimasut pisariaqartitsisut ataqatigiissaakkamik sungiusaqqittarnissaat qulakkeerneqarsinnaaqqullugu.

Napparsimasut pisariaqartitaat periarfissaallu aallaavigalugit katsorsaanermik suliaqartarnissaq anguniarneqartariaqarpoq, taamaaliornikkut napparsimmaviup kommunillu akornanni nikittoqarneratigut sungiusaqqittarneq annaaneqannginniassammat aammalu sungiusaqqinnermi napparsimasut katsorsartereernerup kingorna ilaquttaminnut suliffeqarfinnullu uteqqinniarnerminni Namminersorlutik Oqartussat kommuniniillu nukissaqarnerat aallaavigalugu tunngaviatigut tapersersorneqarsinnaaniassammata.

Angalaqatigiit PAVI-mut takuniaapput, tassaasoq sungiusaqqittarneq pillugu Danmarkimi qanoq maleruagassiortoqarsimanersoq aamma napparsimasut ataasiakkaat aammalu ilaqutaat aaqqissuulluakkamik ataqatigiissumillu sungiusaqqinnissamut Namminersorlutik Oqartussat kommunillu akornanni napparsimasut ilaqutaasullu kisimiilinnginnissaat pillugu qanoq tapersersorneqarsinnaanersut aamma sungiusaqqittarneq anniarunnaarsaanerlu pillugit Ilisimasaqarfik. Sungiusaqqittarnermut tunngatillugu pisortani oqartussaasut akornanni suliassat akisussaaffiup nammatassallu ersarilluinnartumik ataqatigiissumillu agguataarneqartariaqarput.

PAVI nunatsinni ilisimatusarnikkut suliniutini peqataanikuuvoq Danmarkimilu peqqinnissaqarfinnut nipaallisaanikkut sungiusaqqinnernillu ingerlaavartumik nammineq ilisimatusarnermik ingerlataqarluni. Pingaartumik ataatsimiititaliamit aalajangiiffigisassatut siunnersuutip suliarineranut atatillugu kræftimik nappaatillit sungiusaqqinneqartarnerannut atatillugu Livsrum Kræftens Bekæmpelse Roskildemiittoq kræftimik eqqugaasimasunut siunnersuisarfiusoq angalaqatigiit takuniarpaat. Livsrum kræfteqartunut siunnersuisarfiunerata saniatigut assigiinngitsorpassuarnik suliaqarfiusarpoq.

Kræftimik eqqugaasimasunut siunnersuinerup saniatigut kræftimik eqqugaasimasut taakkulu ilaqutaat sammisassaqartinneqartarput peqatigisaanillu innuttaasunut kræftertunut ilaqutaasunut ornittagaavoq. Nunatsinni Livsrum-i napparsimasunik allanik nappaatilinnik aamma inissanik allanik inissaqartitsisinnaavoq.

Taamaakkaluartoq Livsrum-imik pilersaarusiornermi avataaniit aningaasaliisoqarsinnaanera soqutigineqarpoq, taamaattorli Namminersornerullutik Oqartussanit kommuninillu pilersaarummut peqataanissamut politikkikkut kissaateqartoqarnersoq kiisalu qanoq annertutigisumik peqataajumasoqarnersoq apeqqutaalluni. Angalaqatigiit Sankt Lukas Hospice aamma takuniarpaat.

Napparsimasunut neqeroorutit aammalu napparsimasut paaqqutarineqarnissaannut katsorsarneqarnissaannullu isumagisassat qulaajarneqartarnerat qanoq nukittorsarneqarsinnaanerat politikikkut maanna isumaliutigineqarpoq. Nunatsinni hospicemik pilersitsisoqarsinnaanngippat angerlarsimaffinni hospiceqalersinnaanera neqeroorutigineqarsinnaavoq, tamannalu hospicemi takuniakkatsinni annertuumik ilisimasaqarfigineqarpoq, taamatuttaaq Sankt Lukas Hospicemi meeqqanut hospiceqarpoq.

Aammattaaq angalaqatigiit Herstedvesterimi isertitsivimmut paasisassarsiorlutik takuniaapput. Kalaallinik danmarkimi parnaarussanik innuttaasunut akuulersitseqqinniartarneq atornerluinermullu katsorsaasarneq pillugit aammalu Nuummi 2017/18-imi atorneqalersussatut naatsorsuutigineqartumik nutaamik matoqqasumik parnaarussivissamut Herstedvesterimi parnaarussat nuunneqarnissaannut tunngatillugu suleriaasissaq isumaliutillu sukumiinerusumik tusagaqarfiginissaat pillugit pinerlussimasunik isumaginnittoqarfiup oqaloqatigineqarnissaa kiisalu sulisut qanoq piginnaasallit pisariaqartinneqarnersut aamma Hertedvesterimi parnaarussanut neqeroorutit suut neqeroorutigineqartarnersut paasisaqarfigineqarnissaat siunertaralugu Herstedvesterimut parnaarussivinnullu allanut piffissami matumani kalaallinik parnaarussaatillit pillugit paasisaqarnissaq takuniaanerup siunertaraa,

Aammattaaq angalaqatigiit pissarsiffiulluartumik Januscenterimut meeqqanut inuusuttunullu kinguaassiuutitigut atornerlunneqarsimasunut ilisimasanik katersiviullunilu siunnersuisarfimmut atornerluinerup ingerlateqqinnginnissaanut siusissukkut kiisalu pinerlineqartup pinerluttullu naapitinneqartarnerannik immikkut sulialinnut takuniaapput ataatsimeeqatigalugillu.

Naggataatigut angalaqatigiit paasissutissiiffiulluaqisumik nunatsinniit Folketingimut ilaasortaatitagut marluusut Aleqa Hammond aamma Aaja Chemnitz Larsen ataatsimeeqatigaat.

Itinerusumik annertunerusumillu paasisaqarusuttut ataatsimiititaliamut ilaasortanut peqataasunut ataani allassimasunut attaveqarsinnaapput: Inatsisartunut ilaasortaq Tillie Martinussen, Demokraatit, siulittaasoq. Mobil 27 49 27

Inatsisartunut ilaasortaq Agathe Fontain, Inuit Ataqatigiit. Siulittaasup tullia. Mobil 48 45 31

Inatsisartunut ilaasortaq Ane Hansen, Inuit Ataqatigiit. Mobil 58 76 61

Inatsisartunut ilaasortaq Mimi Karlsen, Inuit Ataqatigiit. Mobil 58 76 19