Nutaarsiassat

11-02-2016

Puisip amiinik tunisassiat tuniniarneqarnerisa nukittorsarneqarnissaat Inatsisartuni Aningaasaqarnermut Akileraartarnermullu Ataatsimiititaliamit kiisalu Aalisarnermut, Piniarnermut Nunalerinermullu Ataatsimiititaliamit kissaatigineqarpoq

Ataatsimiititaliat suliaq  pillugu Naalakkersuisunik paasissutissiiviusumik ataatsimeeqa­teqaqqammerput. Ataatsimiititaliat paasissutissat ataatsimiinnermi Naalakkersuisunit saq­qummiunneqartut pillugit naammagisimaarinninnertik oqaatigiumavaat. Puisit amiinik tunisisinnaaneq, atuineq tuniniaanerlu pillugit Naalakkersuisut attanneqarsinnaasumik iluarsiissuteqarniarlutik suliaqarnerminnik ingerlatsiinnarnerat ataatsimiititaliat paasivaat.

Ataatsimiititaliat isumaqarput nunatta puisit amii pillugit avammut nittarsaassinini anni­killisassanngikkaa, aamma EU-mi puisit amii pillugit paasititsiniaanerup annertuneru­nissaanik tigussaanerunissaanillu piumasaqaateqarput. Ataatsimiititaliattaaq piumasaraat Naalakkersuisut tigussaasumik iliuuseqassasut.

Ataatsimiititaliat tamatuma saniatigut isumaqarput nunatsinni puisit amiinik tunisassianik nioqqutissiorneq nukittorsarneqassasoq, kiisalu puisit amii Great Greenlandimeersut nunatsinni mersortarfinnit pisiarineqarsinnaanerisa eqaallisarneqarnissaa anguneqarneqas­sasoq.

Paasissutissanik allanik pissarsiniarluni Aningaasaqarnermut Akileraartarnermullu Ataatsimiititaliap Siulittaasua Jens Immanuelsen oqarasuaammut: +299 52 21 10 kiisalu Aalisarnermut, Piniarnermut Nunalerinermullu Ataatsimiititaliap Siulittaasua Nikolaj Jerimiassen oqarasuaammut: +299 53 32 63 saaffigineqarsinnaapput.