Nutaarsiassat


2019 2018 2017 Flere år...

15-03-2016

2016-imi upernaakkut ataatsimiinnissami oqaluuserisassat piareerput

2016-imi Inatsisartut upernaakkut ataatsimiinnissaannut (UPA2016-imut) oqaluuserisassat ullumikkut tamanut saqqummiunneqarput.

 

Inatsisartut upernaakkut ataatsimiinnerat tallimanngornermi apriilip ulluisa arfineq-aappaanni aallartissaaq, tallimanngornermilu juunip ulluisa pingajuanni 2016 naammassinissaa pilersaarutigineqarluni.

 

Inatsisartunut ilaasortat siunnersuutaat katillugit immikkoortut 57-it Naalakkersuisunillu immikkoortut 29-t oqaluuserisassanut ilanngunneqarput.

 

Sapaatit akunnerini ataatsimiiffiusartussani ullut ataatsimiiffiusartussat ima agguataarneqarput:

  • Sapaatip akunneranut ullut tallimat nal. 10.00-imiit nal. 14.00-imut ataatsimiiffiusassapput.
  • Pingasunngornerit tamaasa piffissami nal. 10.00-imiit nal. 11.00-imut sapaatip akunnikkaartumik akunneq naalakkersuisunut apeqquteqarfiusinnaasoq ingerlanneqartassaaq, tamatumalu kingorna ataatsimiinneq nal. 14.00 tungaanut ingerlasassalluni. Akunneq apeqquteqarfiusinnaasoq siulleq ulloq 13. april ingerlanneqassaaq.
  • Ulluni 17. - 19. maj Arctic Circle Forumip ataatsimeersuartitsinerata naalani Inatsisartuni ataatsimiittoqartassanngilaq.
  • Nalliuttuni, tassa Tussiarfissuarmi 22. april, Qilaliarfimmi 5. maj aamma Piinsip ulluisa aappaanni 16. maj, Inatsisartuni ataatsimiittoqassanngilaq.

 

UPA2016-imut tunngatillugu atortussat tamarmik nittartakkatsinni www.inatsisartut.gl takuneqarsinnaapput. Nittartagaq pisarnertut nutartertuarneqassaaq, atortussalli tamarmik aamma ingerlaavartumik qarasaasiakkut tigusarnissaannut periarfissaqartuarpoq. Tamanna kissaatigigaanni Laila Kristiansen lkri@inatsisartut.gl saaffigineqassaaq.

 

 

Lars-Emil Johansen

Inatsisartut Siulittaasuat