Nutaarsiassat


2019 2018 2017 Flere år...

20-05-2016

Naalagaaffiit Peqatigiit aaqqissuussaanerat nutarterneqarnissaminut ingerlavoq - nuannaarnissamut pissutissaqarpoq

Nunanut Allanut Sillimaniarnissamullu Ataatsimiititaliaq Naalagaaffiit Peqatigiit Apeqqutit Nunat Inoqqaavinut tunngasut pillugit Aalajangersimasumik Oqallittarfiata ingerlanneqarnerata immikkoortuata aappaanut peqataavoq Per Rosing-Petersen aallartitaralugu.

 

2014-imi nunarsuaq tamakkerlugu nunat inoqqaavisa ataatsimeersuarnerannit inaarutaasumik nalunaarut akuersissutigineqarmalli Naalagaaffiit Peqatigiit iluanni aalajangiiniartarnernut atatillugu nunat inoqqaavisa peqataanissaminnut, minnerunngitsumillu, tusaaniarneqartarnissaminnut pitsaanerusunik periarfissinneqarnissaat sulissutigineqarsimavoq. Naalagaaffiit Peqatigiit iluanni nunat inoqqaavisa soqutigisaasa akuutinneqarnerulernissaat nalinginnaasumik annertuumik tapersersorneqarpoq. Per Rosing-Petersen, naak inuiaat kalaallit nunat tamalaat akornanni inatsisitigut inuiattut immikkuullarissutut akuerineqarsimagaluartut, tamatumunnga atatillugu nutarteriniarluni suliniarnermut tapersiilluni oqaaseqaateqarpoq, oqarlunilu:

 

"Nunanut Allanut Sillimaniarnermullu Ataatsimiititaliap Naalagaaffinni Peqatigiinni taassumalu iluani pisartuni nunat inoqqaavisa aalajangersimasumik alaatsinaatsutut inissisimalernissaat tamakkiisumik tapersersorpaa, nuannaarutigalugulu nunat Naalagaaffinnut Peqatigiinnut ilaasortat taama amerlatigisut siunnersuut tapersersormassuk".

 

Aalajangersimasup Oqallittarfimmut peqataanermi saniatigut Per Rosing-Petersen Apeqqutit Nunat Inoqqaavinut tunngasut pillugu Aalajangersimasumik Oqallittarfiup ingerlanneqarneranut atatillugu saniatigut pisunut assigiinngitsunut peqataavoq.

 

 

Paasissutissanik sukumiinerusumik pissarsiniaraanni Nunanut Allanut Sillimaniarnermullu Ataatsimiititaliap aallartitaa ugguuna pissarsiarineqarsinnaavoq: Per Rosing-Petersen - mobil 55 27 75