Nutaarsiassat


2019 2018 2017 Flere år...

09-08-2016

Uusarqak Qujaukitsoq Inatsisartut Siulittaasuata tullianit Agathe Fontainimit sølviusumik Nersornaaserneqartoq

Inatsisartut Siulittaasoqarfiata Uusarqak Qujaukitsoq sølviusumik Nersornaaserpaat inuiaqatigiinni kikkunnut tamanut atugassarititaasut pitsanngorsarniarlugit ilungersorluni suliniuteqarsimanera nersorniarlugu.

 

Inatsisartut Siulittaasuata tulliata siulliup Agathe Fontainip Uusarqak Qujaukitsumut oqaaseqarnermini ilaatigut makku erseqqissarpai:

 

Tale KL

 

"Suliniarnerit qangali maluginiarneqartarsimavoq, naalakkersuinikkut sulinermi malunnaateqarsimallutit ukiullu ingerlanerni kommunalbestyrelsimut, siullermik 1971-imi, Inatsisartunullu, siullermik 1984-imi, ilaasortaasarsimallutit.

 

Siusinnerusukkut oqarsimavutit 1980-ikkut aallartilaarneranni puisit amii pillugit paasisitsiniaanermut peqataanerit inuuninni suliarisimasavit pingaarnersarigaat, kisiannili aamma minnerunngitsumik kingusinnerusukkut maluginiarneqarsimavutit Uummannamit nuutsitaanerup 1968-imilu Pituffiup eqqaani timmisartorsuup qaartartorsuutip B-52-ip nakkarnerata kingunerinut taarsiiffigitinnissamik sorsuuteqarnermi, Inatsisartut Siulittaasoqarfiata isumaa malillugu pingaaruteqartutut oqaatigineqartariaqartunik. (...)

 

Taamatuttaaq Inuit Issittormiut Siunnersuisoqatigiiffianni, ICC-mi, ilaatigut nunatsinnit aallartitat siulittaasuata tulliatut, suliniarsimanerit puigorneqartariaqanngilaq, nunat inoqqaavisa pisinnaatitaaffii sorsuutigalugit. Pituffimmi radareqarnikkut amerikarmiut annertusaanialermata ICC-mi suleqataavutit kingunerisinnaasai uparuartorlugit, innuttaasut illersorniarlugit.

 

Suliassat taakkartorneqartut imaannaanngikkaluartut illit, Uusarqak, ataasiaannarnak tunuarsimaarnak peqataasarsimavutit innuttaasut pisinnaatitaaffiisa sorsuutigineqarnerini, minnerunngitsumillu innuttaasut qulaatiinnarlugit aalajangiisoqarsinnaanngimmat, taamaaliortoqarpallu tamatuma kinguneqartinneqartariaqarneranik."

 

 

Siulittaasoqarfik sinnerlugu

 

Agathe Fontain

Inatsisartut Siulittaasuata tullia siulleq

 

Paasissutissat sukumiinerusut Tina Naamansen +299 53 98 57 attaveqarfigalugu pissarsiarineqarsinnaapput.