2024 2023 2022 Flere år...
17-08-2016
Inatsisinut Ataatsimiititaliamut ilaasortat ilisimasanik nutaanik maannakkut saqqumilaartunut attuumassutilinnik isumassarsinartunillu pissarsiffiusumik paasisassarsiorlutik angalaqqammerput
Inatsisinut Ataatsimiititaliamit aallartitat ulluni 8. - 11. august 2016 Københavnimi eqqaanilu paasisassarsiorlutik angalapput.
Nunatsinni politiit sulinerminni atugassaat Pinerluuteqarsimasunillu Isumaginnittoqarfimmut tunngavissiissutit sammillugit ataatsimiititaliap suliaqarneranut atatillugu angalaneq ingerlanneqarpoq, kiisalu ataatsimiititaliap ilinniagaqarfinni ilinniartullu ineqarfiini ikiaroornartumik atuisoqarsimasinnaaneranut misissuiffiginnilluni misiliummik tigusiffiginnissinnaalernissamut Inatsisartut inatsisissaattut siunnersuummik suliaqarnerminut atatillugu ataatsimiititaliap paasissutissanik pissarsinissaa isumannaarniarlugu.
Angalaneq Københavnimi Kalaallit Illuutaannut pulaarnermik aallarnerneqarpoq - tassani toqqammavigisaqartitsinikkut suliaqarneq (inummut sivisussusiligaanngitsumik inissinneqarsimasumut ikiorteqartitsineq) tusagaqarfigiumallugu. Toqqammavigisaqartitsisut inunnut inissiisarfimmi tarnip pissusaanik ilisimasalinnit aqunneqartumut imaluunniit sivisussusiligaanngitsumik inissitassanngorlugit eqqartuussuteqartunut ikiortissatut toqqagaasarput, suliassaralugulu inissinneqarnerup tassanilu pillaatitut atugaritinneqartut pisarialik sinnerlugu sivisussuseqartannginnissaasa isumannaarnissaa. Aaqqissuussaq Kalaallit Illuutaannit allaffissornikkut aqunneqarpoq. Ataatsimiinnermi toqqammavigisaqartitsinikkut suliaqarneq ikorfartorniarlugu iliuuserineqarsinnaasut pillugit paasissutissanik Kalaallit Illuutaannit saqqummiussisoqarpoq. Inatsisinut Ataatsimiititaliap suliamik ingerlatseqqinnermini tamakku ingerlateqqissavai.
Ataatsimiititaliap tamatuma saniatigut Folketingip Ombudsmandia pulaarpaa, Ombudsmandip atuuffii, tassani aamma Kalaallit Nunaanni Ombudsmandimut taartaasartutut atuuffia, Ombudsmandip Kalaallit Nunaanni inissiisarfinnik unnuisitsisarfinnillu nakkutilliiartortarnera kiisalu ikiaroornartumik atuisimasinnaanermut misiliummik tigusiffiginninnermut atatillugu ilinniarnertuunngorniamik ilinniagaqarfimmit qimagutsitsisimaneq pillugu Ombudsmandip isumaliusersuutai pillugit tusagaqarumalluni (FOB 2013-24).
Herstedvesterimut pulaarnermi kalaallit pineqaatissinneqarsimasut inissinneqarnerminni atugaat pingaarnertut isiginiarneqarput. Ataatsimiititaliaq pulaarnermini immikkoortumi KL-imi, sannavimmi/sullivimmi kiisalu aneertarfimmi takornarniarluni angalaarunneqarpoq. Pulaarneq kalaallinik inissinneqarsimasunik, ataatsimiititaliamik naapitsinissaminnik kissaateqarsimasunik ataatsimeeqateqarnermik naggaserneqarpoq. Ataatsimiinnermi Nuummi matoqqasumik inissiisarfissap pilersinneqarneranut atatillugu pissutsit isiginiarneqarnissaat pingaartitatik pineqaatissinneqarsimasut ersersippaat. Tamatuma saniatigut Herstedvesterimi maannakkut inissinneqarnerminni atukkatik qanoq misiginerlugit oqariartuutigaat. Paasissutissat tunniunneqartut pillugit ataatsimiititaliaq qujavoq paasisallu taakku ataatsimiititaliap suliamik ingerlatseqqinnermini tunngavigissavai.
Ataatsimiititaliap Rigspolitiit peqatigalugit nunatsinni politiit atugaat eqqartuiffigai, tassani inuttalersugaanikkut, illuuteqarnikkut atortulersugaanikkullu pissutsit isiginiarlugit. Ataatsimiinneq pisoq nangillugulusooq nunatsinni Politimesterimik Bjørn Tegner Bayimik ukiamut ataatsimeeqateqarnissaq pillugu isumaqatigiittoqarpoq.
Inuit pisinnaatitaaffii pillugit ilisimatusarfimmi (Institut for Menneskerettigheder) Ilinniarfinni aamma ilinniagaqartut ineqarfiini aangajaarniutinik atuisoqartarnersoq pillugu misissuisoqartarnissaanut Inatsisartut inatsisissaattut siunnersuutip inuit pisinnaatitaffii eqqarsaatigalugit ajornartorsiutit nassatarisinnaasai pillugu paasissutissanik ataatsimiititaliaq pissarsivoq. Ilisimalikkat ataatsimiititaliamit qujassutigineqarput ataatsimiititaliallu inatsisissatut siunnersuummik suliaqarnerminik ingerlatseqqinnerani tunngavigineqassapput.
Paasissutissanik allanik itisiliivigineqarnissamillu kissaateqarnermi ataatsimiititaliamut ilaasortat uku peqataasut saaffigineqarsinnaapput:
Inatsisartunut ilaasortaq Anders Olsen, Siulittaasoq. Oqarasuaat 49 07 08
Inatsisartunut ilaasortaq Iddimanngiiu Bianco, Siulittaasup tullia. Oqarasuaat 54 88 44
Inatsisartunut ilaasortaq Michael Rosing. Oqarasuaat 53 05 31
Inatsisartunut ilaasortaq Laura Taunajik. Oqarasuaat 56 26 49