2024 2023 2022 Flere år...
26-08-2016
Saliisoqarnissaanik aamma arlaannaannulluunniit attuumassuteqanngitsumik misissuisitsinissamik erseqqissumik piumasaqaat
Iliuuseqartoqartariaqarpoq - Inatsisartut Nunanut Allanut Sillimaniarnermullu Ataatsimiititaliaat tamarmiusoq sakkutooqarnikkut illersornissamullu atortulersuutit salinneqarnissaannik erseqqissumik piumasaqaateqarpoq. Peqatigitillugu mingutsitsinerup annertussusiata arlaannaannulluunniit attaveqanngitsunit nutaamik misissuivigineqarnissaanik saliisoqarnissaanillu pisariaqartitsineq ataatsimiititaliap tikkuarpaa.
Misissuinerit nutaat takutippaat nunarsuatta kissatsikkiartornerata malitsigisaanik Camp Centuryp eqqaani sermeq siullermik naatsorsuutigisamit sukkanerusujussuarmik aakkiar-tortoq. Taamaattumik akuutissanik atortunillu allanik mingutsitsisinnaasunik avatangiisinullu ulorianarsinnaasunik seerisoqarnissaa pinngitsoorniarlugu sumiiffimmi sukumiisumik nakkutiginnittoqarlunilu misissuisoqartarnissaa pisariaqarpoq. Saliisoqartariaqarpoq. Nunanut Allanut Sillimaniarnermullku Ataatsimiititaliaq tamarmiusoq taama isumaqarpoq.
Ataatsimiititaliap peqatigitillugu uparuassavaa Camp Centuryp saniatigut Kalaallit Nunaanni sumiiffinni assigiinngitsuni aamma sakkutooqarnermut atatillugu atortulersuutinik qimaannarneqarsimasunik allanik peqarmat. Naatsorsuutigineqartariaqarpoq silap pissusiisa allanngoriartorneri pissutigalugit atortulersuutit pineqartut mingutsitsisinnaanerisa allannguuteqarsimanissaat. Atortulersuutit sorsunnersuup kingulliup sorsunnerullu nillertup nalaani Kalaallit Nunaata inissisimanerata qanoq pingaaruteqarsimassusia takutiinnarnagu, aamma sakkutooqarfinnik sakkutooqarnermilu atortulersuutinik matusinermut atatillugu avatangiisinut ulorianaataasinnaasut taamanikkut naammanngilluinnartumik isigineqartarsimanerat takutippaat. Kalaallit Nunaannit piumasaqaat erseqqittariaqarpoq: Saliisoqartariaqarpoq.
Ataatsimiititaliap kaammattuutigaa sakkutooqarnermi atortulersuutit qimaannarneqarsimasut nalunaarsorlugit, mingutsitsinerullu annertussusia avatangiisinullu sunniutai misissorlugit, arlaannaanngulluunniit attaveqanngitsumik nutaamik misissuisitsisoqartariaqartoq. Tamanna pissaaq silap pissusiisa allanngoriartornerisa Camp Centurymit mingutsitsisinnaanermut sunniutigisinnaasai pillugit paasissutissat nutaat tunngavigalugit. Ataatsimiititaliap minnerunngitsumik piumasaraa iliuusissanut pilersaarusiortoqartariaqartoq, saliinissap pingaarnersiuilluni tulleriiaarneqarnissaa pilersaarusiorlugu. Misissuinernik pisoqaanerusu-nik peqareerpoq, arlaannaannulluunniit attaveqanngitsumik misissuisitsinermi aallaavigineqarsinnaasunik.
Justus Hansen
Nunanut Allanut Sillimaniarnermullu Ataatsimiititaliap Siulittaasua
Paasissutissat sukumiinerusut ataatsimiititaliap siulittaasua Justus Hansen +299 53 12 10 attaveqarfigalugu pissarsiarineqarsinnaapput