2024 2023 2022 Flere år...
07-09-2016
Alloriarneq Tulleq - Ilulissani isummersoqatigiinneq
Inatsisartut Siulittaasoqarfiat ulluni 8. - 12. september 2016 Ilulissani isummersoqatigiissitsiniarpoq Alloriarneq Tulleq / NEXT STEP qulequtaralugu.
Isummersoqatigiinneq oqaatsit, kinaassuseq oqalliseriaaserlu qulequtaralugit oqallinnermik imaqassaaq. Isummersoqatigiinneq Inatsisartuni inuiaqatigiillu akornanni pitsaanerusumik oqalliseriaaseqalernissap pisariaqartinneqarnerata eqqumaffigineqarnerulernissaa siunertaralugu, oqalliseriaatsimut matumunnga tunngaviusut qulaajarneqarnerinut peqataassaaq.
Taamatuttaaq isummersoqatigiinneq, suleqatigiissitani sulineq oqallinnerlu aqqutigalugit, iliuusissanut aalajangersimasunut siunnersuutinik, Inatsisartuni nalinginnaasumillu inuiaqatigiinni naalakkersuinikkut oqalliseriaatsimik pitsaanerulersitsillutillu qaffassaasinnaasunik tikkuussiviussaaq. Ammanerusumik, tamatigoornerusumik paqumigisaqannginnerullunilu oqallinneq aalajangiisarnernik pitsaanerusunik akunnaannerusunillu malitseqarsinnaavoq. Inatsisartuni oqalliseriaaseq pitsaanerusoq tamatuma saniatigut innuttaasut isummersuutiminnik tunngavilersuineranni isumassarsiffiusinnaavoq, inuiaqatigiinnilu nalinginnaasumik naalakkersuinikkut peqataarusussuseqarnermik siuarsaaqataalluni.
Isummersoqatigiinneq oqaluttuarisaaneq eqqarsaatigalugu isummersoqatigiinnermik "Sisimiut 1970"-mik aallaaveqassaaq. Taamanikkut ullut 14-it ingerlaneranni qulequttat namminersornerulernissap aggersup ilusilersorneqarneranut pingaaruteqartussat sammineqarsimapput. Qulequttat soorlu nunatsinni akileraartalernissaq, oqaatsit inissisimanerat, meeqqanik perorsaaneq, nunatsinni naalakkersuinikkut oqartussanik pilersitsinissat il.il. oqallisigineqarput, isummersoqatigiinnerlu aalajangersakkamik kingorna saqqummiunneqartumik akuersissuteqarnermik inernilerneqarpoq, soorluttaaq isummersoqatigiinneq pillugu quppersakkamik saqqummersitsisoqartoq.
Soorunami 1970-imi isummersoqatigiinneq angusanik erseqqissunik sunik malitseqarsimanersoq erseqqissumik oqaatigissallugu ajornarpoq. Kisiannili mattunneqarsinnaanngilaq 1970-ikkunni nunatsinni naalakkersuinikkut suliniarnerit annertuut, soorlu EF pillugu oqallinneq, ANISA-p EAS-illu pilersinneqarnerat, Aasiveqartalernera, partiinik pilersitsiortornerit allallu 1979-imi namminersornerulernitsinnik inerneqartut, naalakkersuinikkut eqeersimaalernermit 1970-imi isummersoqatigiinnermi ikinneqarsimasumit aallaaveqarsimasinnaanerat. Taamaattoq "Alloriarneq Tulleq 2016" 1970-imi isummersoqatigiinnermik assiliinerunanilu uteqqiineruinnaassanngilaq.
Neriuutigineqarporli isumatoqqat piliutiinnakkat pitarlugit nutaaliorluni siunissamik pilersitserusussuseqarneq 1970-imi isummersoqatigiinnermi ersersinneqartoq aamma ukioq manna 2016-imi isummassarsiorfigineqarsinnaassasoq. Isummersoqatigiinnermut inuit 55-it peqataassapput, inuillu assigiinngitsut sumiiffinnit assigiinngitsuneersut 16-it oqallisissianik saqqummiussaqassallutik. Isummersoqatigiinneq kalaallisut ingerlanneqassaaq.
Pisussanut pilersaarut peqataasussallu allattorsimaffiat ataani aaneqarsinnaapput:
Lars-Emil Johansen
Inatsisartut Siulittaasuat