2024 2023 2022 Flere år...
13-09-2016
Ilulissani isummersoqatigiinnermit "Alloriarneq Tulleq"-mit inaarutaasumik oqaaseqaat.
Inatsisartut Siulittaasoqarfiata Ilulissani isummersoqatigiissitsinera naammassilluarpoq, isummersoqatigiinnerlu naggaserlugu peqataasunit isummersoqatigiinnermit Inatsisartunut oqaaseqaataat Inatsisartut Siulittaasuannut tunniunneqarluni.
Siulittaasoqarfiup isummersoqatigiinnermi oqallisissiatut saqqummiunneqartut tamatumunngalu atatillugu atortussat maanna katersorpai piffissami qaninnermi Inatsisartut nittartagaanni tamanut saqqummiunneqarnissaat siunertaralugu.
Siusinnerusukkut ilisimatitsissutigineqartutut isummersoqatigiinnermi nunatta siunissaa pillugu 1970-imi Sisimiuni ataatsimeersuarneq aallaavigineqarsimavoq, taamaattumillu aamma siumut eqqoriaruminaassimalluni 2016-imi isummersoqatigiinneq qanoq inerneqarumaarnersoq, soorlu aamma erseqqissumik oqaatigineqarsinnaanngitsoq 1970-imi ataatsimeersuarneq sunik tigussaasunik malitseqarsimanersoq. Mattunneqarsinnaanngilarli 1970-ikkut ingerlaneranni nunatsinni naalakkersuinikkut eqeeriartulerneq, tamatumunnga ilanngullugit EF pillugu oqallinneq, tamatumalu malitsigisaanik ANISA-mik EAS-imillu pilersitsinerit, Aasiveqartalernerit, partiiliortalernerit il.il. 1979-imi namminersornerulernermik inerneqartut - naalakkersuinikkut eqeersimaarnermik 1970-imi ataatsimeersuarnermit ikummarissarneqartumit aallaaveqarsinnaasut.
"Alloriarneq Tulleq 2016" aamma eqqarsaataasimavoq 1970-imi ataatsimeersuartitsinermik uteqqiinerinnaassanngitsutut, neriuutigineqarluni isummat pioreersut pitarlugit isummanik nutaanik pilersitsisinnaanermut piumassuseqarneq siunissamillu pilersitserusunneq, 1970-imi ataatsimeersuartitsinermi aamma ersersinneqartoq, aamma ukioq manna 2016-imi isumassarsiffiusinnaassasoq.
Taamaalillunilu isummersoqatigiinneq naammassivoq, ingerlanerani oqalliffiulluarluni, maanna peqataasut ataasiakkaat tamarmik ingerlateqqissinnaasaannik innuttaasullu allat peqatigalugit, najukkani ataasiakkaani, nittartakkani inuit oqallittarfiini assigisaannilu oqallisigeqqissinnaasaannik, neriuutigalugu nunatta siunissaa pillugu tunngavilersorluakkamik eqeersimaartumillu oqallinnermik nutaamik pilersitsisoqarnissaa. Taamaalilluni kaammattuut tamanna aamma matumuuna ingerlateqqinneqarpoq.
Lars-Emil Johansen
Inatsisartut Siulittaasuat
