Nutaarsiassat


2019 2018 2017 Flere år...

28-10-2016

2016-imi ukiakkut ataatsimiinnermut atatillugu ulluni Inatsisartut ataatsimiiffissaanni allannguutit

Naalakkersuisooqatigiinni ippassaq allannguutit kingorna Inatsisartut Siulittaasoqarfiata aalajangerpaa ataasinngorneq ulloq 31. oktober 2016 nal. 10.00-imiit Inatsisartuni immikkut ataatsimiiffiussasoq.

 

Ataatsimiinnermi Inatsisartut oqaluuserisassani immikkoortoq 4, Inatsisartuni ataatsimiititalianut ilaasortassanik sinniisussanillu qinersineq, oqaluuserisassavaat. Tamanna pereerpat ataatsimiititaliat inissitsitissapput.

 

Sapaatit akunnerata 44-p sinnera marlunngornermiit ulloq 1. novemberimiit ataasinngorneq ulloq 7. november ilanngullugu Inatsisartuni suli ataatsimiiffiussanngillat. Tamatuma kingorna Inatsisartuni ulloq ataatsimiiffissaq tulleq tassaassaaq ulloq 8. november nal. 10.00.

 

Ulluni 27. aamma 28. oktober kiisalu 7. november oqaluuserisassaasimagaluartut novemberip pingajuata kinguninngua nalunaarutigineqassapput.

 

Ilanngullugu nalunaarutigineqarsinnaavoq oqaluuserisassani immikkoortoq 128, Meeqqanik ikiorsiisarneq pillugu Inatsisartut inatsisissaattut siunnersuut, Naalakkersuisut ukiakkut ataatsimiinnermit oqaluuserisassanit tunuartimmassuk.

 

Inatsisartut oqaluuserisassaanni allannguutit kingulliit www.inatsisartut.gl-imi takuneqarsinnaapput. Nittartagaq ulloq 23. september 2016 attaveqaatit aqqutaanni isertunik anisunillu aqutsissutip ajutoornerata kingorna suli pissusissamisut tamakkiisumik ingerlaleqqissimanngilaq, atortussanillu amigaateqassagaluaraanni tamanna pillugu Laila Kristiansen lkri@inatsisartut.gl atorlugu attaveqarfigineqarsinnaavoq.