Nutaarsiassat


2019 2018 2017 Flere år...

03-11-2016

2016-imi Inatsisartut ukiakkut ataatsimiinneranni allannguutit

Inatsisartut Siulittaasoqarfiat inatsisartut ukiakkut ataatsimiinnerat ingerlasoq eqqarsaatigalugu allannguutinik assigiinngitsunik ullumi aalajangiipput.

 

Oqaluuserisassani immikkoortut assigiinngitsut oqaluuserineqarfissaat allanngortinneqarput:

  • Immikkoortoq 49 ulloq 16. november aappassaaniigassanngortinneqarpoq.
  • Immikkoortoq 133 ulloq 14. november aappassaaneerneqariarluni ulloq 18. november pingajussaaneerneqassaaq.
  • Immikkoortoq 120 ulloq 14. november aappassaaneerneqariarluni ulloq 17. november pingajussaaneerneqassaaq.
  • Apeqquteqaat aallaavigalugu oqallinnissamik siunnersuutit immikkoortut 103 aamma 141 marluullutik ulloq 15. november oqaluuserineqartussanngortinneqarput
  • Ullunit ataatsimiiffiusussaagaluartunit 27. aamma 28. oktober, kiisalu 7. november immikkoortut nutaanik ullulerneqarput Inatsisartut nittartagaanni qulequttanut takussutissiami takuneqarsinnaasutut. Tamatumani pineqarput immikkoortut 7, 11, 25, 28, 29, 31, 35, 38, 46, 52, 59, 81, 89, 97, 98, 126, 129, 130, 133, 135 aamma 142.
  • Immikkoortut 51 aamma 52 siunnersuuteqartumit tunuartinneqarput, immikkoortorlu 112 Naalakkersuisunit tunuartinneqarluni.

 

Siumumit siunnersuutit eqqarsaatigalugit Jens Immanuelsenip immikkoortut 30, 31, 33, 34 aamma 37 Suka K. Frederiksenimit tiguai. Inuit Ataqatigiit Inatsisartunut ilaasortaatitaasa Naalakkersuisunut nutaamik ilaasortanngortitamik siunnersuutaat tiguaat. Tamatumani pineqarput immikkoortut 90, 106, 107, 108, 109, 127, 141, 137, 95, 99, 102, 103, 46, 47, 48, 49 aamma 50. Demokraatit Inatsisartunut ilaasortaatitaasa Poul Hansenimit Tillie Martinussenimillu siunnersuutit aamma § 37 naapertorlugu apeqqutit tamaasa tiguaat.

 

Ukiakkut ataatsimiinnermi akunnerit apeqquteqarfiusinnaasut kingulliit marluk ingerlanneqassapput ulloq 9. november, tamatumani Isumaginninnermut, Ilageeqarnermut, Naligiissitaanermut Inatsisinillu atuutsitsinermut Naalakkersuisoq Sara Olsvig aperineqarsinnaassalluni, aamma ulloq 16. november, tamatumani Aalisarnermut Piniarnermullu Naalakkersuisoq Hans Enoksen aperineqarsinnaassalluni.

 

Inatsisartut oqaluuserisassaanni allannguutit www.inatsisartut.gl -imi takuneqarsinnaapput. Nittartagaq ulloq 23. september 2016 attaveqaatit aqqutaanni isertunik anisunillu aqutsissutip ajutoornerata kingorna suli pissusissamisut tamakkiisumik ingerlaleqqissimanngilaq, atortussanillu amigaateqassagaluaraanni tamanna pillugu Laila Kristiansen lkri@inatsisartut.gl atorlugu attaveqarfigineqarsinnaavoq.