2024 2023 2022 Flere år...
18-05-2017
Nunanut Allanut Sillimaniarnermullu Ataatsimiititaliaq Naalagaaffinnut Peqatigiinnut naammagittaalliuut pillugu ilisimatinneqanngilaq
Kalaallit Nunaanni amerikarmiut sakkutooqarnikkut najuussimanerata kingorna avatangiisinik saliinissamut akiliinissamut ullumikkut Danmarkip akuersissuteqarsimannginnera pissutigalugu Kalaallit Nunaat sinnerlugu Danmarkip Naalagaaffiit Peqatigiinnut suliassanngortinnissaanut Nunanut allanut Naalakkersuisuusimasoq, Vittus Qujaukitsoq, Nunanut Allanut Sillimaniarnermullu Ataatsimiititaliap piginnaatissimanngilaa.
Naalakkersuisuusimasup apriilimi taamatut suliassanngortitsisimaneranik taamatuttaaq Nunanut Allanut Sillimaniarnermullu Ataatsimiititaliaq ilisimatinneqarsimanngilaq.
Nunanut allanut Naalakkersuisuusimasoq Vittus Qujaukitsoq KNR-imi issuarneqarsimavoq oqarluni taamatut naammagittaalliuuteqarnissamut Nunanut Allanut Sillimaniarnermullu Ataatsimiititaliamit piginnaatinneqarsimalluni. Vittus Qujaukitsup innersuussutigaa taamanikkut Danmarkimi nunanut allanut ministeriusumut Kristian Jensenimut ILO-p aalajangersagaa nr. 169 aamma nunat inoqqaavisa pisinnaatitaaffii pillugit Naalagaaffiit Peqatigiit nalunaarutaat naapertorlugit Danmarkip pisussaaffii eqqaasitsissutigalugit Kalaallit Nunaatalu kissaatai naammassineqanngippata suliassap Naalagaaffinnut Peqatigiinnut suliassanngortinneqarsinnaanera sioorasaarutigalugu ulloq 24. oktober 2016 allakkiani pillugu Nunanut Allanut Sillimaniarnermullu Ataatsimiititaliaq ilisimatissimallugu.
Nunanut Allanut Sillimaniarnermullu Ataatsimiititaliap uppernarsarsinnaavaa Nunanut allanut Naalakkersuisuusimasoq ulloq 31. oktober allakkiap pineqartup, sapaatip akunnera ataaseq sioqqullugu Danmarkimi nunanut allanut ministerimut nassiunneqarsimasup, assilineranik ataatsimiititaliamut nassiussaqarmat.
Ataatsimiititaliap naluaa suna pissutigalugu Nunanut allanut Naalakkersuisuusimasoq isumaqalersimanersoq sioorasaaraluni allakkiami nassiussimasami assilinerinik ataatsimiititaliamut nassiussinikkut sioorasaarutit timitalerneqarnissaannut piginnaatinneqarsimalluni.
Ilanngunneqarsinnaavoq sioorasaarutitalimmik allakkiaq taamatuttaaq siumoortumik Nunanut Allanut Sillimaniarnermullu Ataatsimiititaliamut saqqummiunneqarsimanngimmat.
Ane Hansen
Nunanut Allanut Sillimaniarnermullu Ataatsimiititaliap siulittaasua
Paasissutissat sukumiinerusut ataatsimiititaliap siulittaasua Ane Hansen, oqarasuaat angallattagaq +299 58 76 61, attaveqarfigalugu pissarsiarineqarsinnaapput.