2024 2023 2022 Flere år...
25-08-2017
2017-imi inatsisartut ukiakkut ataatsimiinnissaannut (UKA2017) oqaluuserisassat ullumi nassiussuunneqarput
Inatsisartut ukiakkut ataatsimiinnerat tallimanngornermi ulloq 22. september nal. 11.00 aallartissaaq, pilersaarutillu malillugit ulloq 16. november 2017 naammassinissaa naatsorsuutigineqarluni.
Inatsisartunut ilaasortanit immikkoortut katillugit 29-t Naalakkersuisunillu immikkoortut 35-t oqaluuserisassanut ilanngunneqarput.
Sapaatit akunnerini ullut ataatsimiiffiusartussat ima agguataarneqarput:
- Ukiakkut ataatsimiinneq tallimanngorneq ulloq 22. september nal. 11.00 aallartissaaq.
- Ataasinngornerni, marlunngornerni pingasunngornernilu Inatsisartuni nal. 11.00-imiit 15.00-imut ataatsimiittoqartassaaq.
- Sisamanngornerni Inatsisartuni nal. 11.00-imiit 16.00-imut ataatsimiittoqartassaaq.
- Tallimanngornerit Inatsisartuni ataatsimiiffiusassanngillat, ulloq 29. september Inatsisartuni nal. 11.00-imiit 15.00-imut ataatsimiiffiusussaq eqqaassanngikkaanni.
- Tamatuma saniatigut pingasunngornerit tamaasa piffissami nal. 11.00-imiit nal. 12.00-imut naalakkersuisunut akunneq apeqquteqarfiusinnaasoq ingerlanneqartassaaq, tamannalu pereeraangat Inatsisartut ataatsimiinnerat nal. 15.00 tungaanut ingerlaqqitassassalluni. Akunneq apeqquteqarfiusinnaasoq siulleq ulloq 27. september ingerlanneqassaaq. Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq.
- Sapaatit akunnerani 44-mi, Nunat Avannarliit Siunnersuisoqatigiiffiata Helsinkimi ukiumoortumik ataatsimiinnerata nalaani, Inatsisartuni ataatsimiittoqassanngilaq.
UKA2017-imut atatillugu atortussat tamarmik www.inatsisartut.gl–imi takuneqarsinnaapput. Iluarsiissutit tamarmik nittartakkami ingerlaavartumik iluarsineqartassapput, taamaattorli suli periarfissaqarpoq atortussat tamaasa qarasaasiakkut tigusarusullugit nalunaarnissamut. Tamanna pillugu Laila Kristiansen lkri@inatsisartut.gl attaveqarfigineqarsinnaavoq.
Lars-Emil Johansen
Formand for Inatsisartut